Neel Mukthi | ప్రపంచంలో అన్ని ఉద్యోగాలకూ సెలవులు, జీతాలు ఉంటాయి. ఆయా ఉద్యోగులు చేసిన పనికి గుర్తింపూ ఉంటుంది. కానీ పెళ్లి అనే బంధంతో తన జీవితాన్ని భర్త, పిల్లలకు అంకితం చేసే మహిళకు మాత్రం ఏ గుర్తింపూ ఉండదు. అంతేకాదు ఉదయం లేచింది మొదలు రాత్రి పడుకునే వరకు అలుపు లేకుండా ఆమె చేసే పని లెక్కలోకే రాదు. పిల్లల్ని కనడం, వారి చదువులు, ఉద్యోగాలు, బాగోగులు అన్నీ చూసుకునే అమ్మ ఆరోగ్య పరిస్థితి గురించి ఆరా తీసేవాళ్లు ఎవరూ ఉండరు. అలాంటి ఓ అమ్మ తన అరవై ఏళ్ల జీవితంలో మొదటిసారి తన బాధ్యతలు వదిలేసింది. తనను తాను వెతుక్కుంటూ తనకు ఇష్టమైన ప్రాంతాల్లో విహరిస్తూ తన కలల్ని నిజం చేసుకుంటున్నది. తన తల్లి మొదటిసారి ఆనందంగా ఉందంటూ తన సంతోషాన్ని సోషల్ మీడియా ద్వారా పంచుకున్నాడు నీల్ ముక్తీ.
హిమాచల్ ప్రదేశ్లోని కోక్సార్ గ్రామానికి చెందిన ఓ మహిళ ఏకంగా ఆరు దశాబ్దాల తరువాత సెలవు తీసుకుంది. బాధ్యతలను పక్కనపెట్టి మంచుతో ఆడుకుంటూ చిన్న పిల్లలా మారిపోయింది. ఆరుబయట మంచుముద్దలతో ఆడుకుంది. ఆమె ఫొటోలు, వీడియోను ఆమె కుమారుడు నీల్ ముక్తీ నెట్టింట పంచుకున్నాడు. ‘కొన్నేళ్ల తరువాత మా అమ్మ పని నుంచి బ్రేక్ తీసుకుంది. ఆమె ఎప్పుడూ మా నాన్న గురించి బాధపడుతుంది. నేను ఎంతో నచ్చచెబితే గానీ ఆమె ఒప్పుకోలేదు’ అంటూ చెప్పుకొచ్చాడు నీల్. అతని అభిప్రాయంతో కొందరు ఏకీభవించగా మరికొందరు మాత్రం అందరికీ అది వర్తించదని అనారోగ్యంతో ఉన్న తన తల్లికి తండ్రి గత 30 ఏళ్లుగా సేవలు చేస్తున్న విషయం పంచుకున్నాడు. ప్రస్తుతం ఈ వీడియో నెట్టింట వైరల్గా మారింది.