సర్కారు బడిలో టీచర్లు పాఠాలు ఏం చెప్తారులే! అనుకుంటారు చాలామంది. కానీ, ప్రామాణికమైన బోధనతో జాతీయ స్థాయి గుర్తింపు తెచ్చుకున్నారు ప్రభుత్వ ఉపాధ్యాయురాలు ఉప్పనూతల మాధవి. దుబ్బాక మున్సిపాలిటీ పరిధిలోని లచ్చపేట ప్రభుత్వ ప్రాథమిక పాఠశాలలో ఎస్జీటీగా పనిచేసిన ఆమె ‘మై లిటిల్ వరల్డ్’ పద్ధతితో పాఠాలు చెబుతూ పిల్లలకు గుణాత్మకమైన విద్యను అందిస్తున్నారు.
ఎస్సీఈఆర్టీ 2024-25 ఆధ్వర్యంలో ‘హార్బింజర్స్ ఆఫ్ చేంజ్ పుస్తకం’లో చోటు దక్కించుకున్నారు. ‘ఇంట గెలిచి రచ్చ గెలవాలి’ అన్న సామెత ఈ లచ్చపేట పంతులమ్మకు అతికినట్టు సరిపోతుంది.
ఉపాధ్యాయ వృత్తిని కొందరు గురువులు జీవనోపాధిగా భావించరు. తమ విద్యార్థులకు బంగారం లాంటి భవిష్యత్తు కల్పించాలని పరితపిస్తుంటారు. బోధనను తపస్సుగా భావిస్తారు. పాఠాలను మంత్రాల్లా వినిపిస్తారు. ప్రత్యేక పద్ధతులను ఎంచుకొని విద్యార్థుల్లో సృజనాత్మకతను వెలికి తీసేందుకు నిరంతరం శ్రమిస్తారు. లచ్చపేట ప్రాథమిక పాఠశాలలో సెకండరీ గ్రేడ్ టీచర్గా పనిచేస్తున్న మాధవి పాఠం చెబితే పిల్లలు ఎప్పటికీ మర్చిపోరు. కూడికలు చెప్పినా, ఎక్కాలు నేర్పించినా, పర్యావరణ పరిరక్షణ పాఠాలు బోధించినా.. ఏ అంశాన్ని ప్రస్తావించినా వినూత్న పద్ధతిలో బోధిస్తారు. ఆ విభిన్న బోధనే ఆమెను ప్రత్యేకమైన ఉపాధ్యాయురాలిగా నిలబెట్టింది. జాతీయ స్థాయిలో గుర్తింపు తెచ్చిపెట్టింది.
పాఠాలు చెప్పడంలోనే కాదు, ఆటలు, పాటలు, నాటికలు.. అన్నిటా విద్యార్థులను భాగం చేస్తున్నారు మాధవి. ఎనిమిదేండ్లుగా ఇదే బడిలో పనిచేస్తున్నారామె. ఒకటి నుంచి ఐదో తరగతి దాకా తెలుగు, ఆంగ్లం బోధిస్తున్నారు. పిల్లలకు పాఠ్యాంశాలను చందమామ కథ కన్నా గొప్పగా చెబుతారు. ఇంట్లో, బడి పరిసరాల్లో లభించే అట్టపెట్టెలు, ఇతర వస్తువులు (లో కాస్ట్.. నో కాస్ట్) ఆధారంగా బోధన పరికరాలను ముందుగా సమకూర్చుకుంటారు. వాటి ఆధారంగా పాఠ్యాంశాన్ని ఆటగా, పాటగా బోధిస్తారు. కఠినంగా అనిపించే పాఠాలను తోలుబొమ్మలాటతో సరళంగా చెబుతారు. ఒక పెద్ద అట్టడబ్బాను ప్రదర్శనశాలగా ఏర్పాటుచేశారు. అందులో జంతువులు, పక్షులు, చెట్లు, మనుషులు లాంటివి అట్టముక్కలతో తయారుచేసి, వాటితో (పప్పెట్ షో మాదిరిగా) పిల్లలకు పాఠం చెబుతారు. మాధవి రూపొందించిన పప్పెట్ షో విధానాన్ని గుర్తించిన ఎస్సీఈఆర్టీ (రాష్ట్ర విద్యా పరిశోధన మరియు శిక్షణ సంస్థ) ఈ విద్యా సంవత్సరానికి గాను ఆమె సక్సెస్ స్టోరీని ‘హార్బింజర్స్ ఆఫ్ చేంజ్’ పుస్తకంలో ప్రచురించింది. మాధవి ఒకే సమయంలో మండల, జిల్లా స్థాయి ఉత్తమ ఉపాధ్యాయురాలుగా అవార్డు అందుకోవడం విశేషం. అరుదైన బోధనతో విద్యార్థులకు ఆడుతూపాడుతూ పాఠాలు చెబుతున్న మాధవి.. పిల్లల తల్లిదండ్రులు, సహోపాధ్యాయులు, విద్యాధికారుల మన్ననలు అందుకుంటున్నారు.
మాధవి స్వగ్రామం కూడా లచ్చపేటే! ఆమె టీచర్గా పనిచేస్తున్న బడిలోనే ఆమె బాల్యంలో అక్షరాలు దిద్దింది. పాఠాలు నేర్చుకుంది. భవిష్యత్తుకు బాటలు పరుచుకుంది. ఇప్పుడు అదే బడిలో పంతులమ్మగా ఎనిమిదేండ్లు పనిచేసింది. తన ఊరి పిల్లలకు అండగా నిలిచింది. ‘నేను చదువుకున్న బడిలోనే పనిచేయడం గర్వంగా ఉంది. నాపై నమ్మకంతో మా ఊళ్లోవాళ్లు తమ పిల్లలను ప్రైవేటు బడులకు కాకుండా ప్రభుత్వ పాఠశాలకు పంపించారు.
ఇటీవలే గంభీర్పూర్ ప్రాథమిక పాఠశాలకు బదిలీ అయ్యాను. సర్కారు బడి అంటే పేద విద్యార్థులే ఉంటారు. వారికి గుణాత్మక విద్యను అందించాలన్న లక్ష్యంతో ప్రయోగాత్మకంగా బోధిస్తున్నా. అట్టముక్కలతో బొమ్మలను తయారుచేసి, వాటితో ఆటపాటలతో పాఠ్యాంశాలను వివరిస్తున్నాను. ఈ విధానం ద్వారా పిల్లల్లో ఆలోచన శక్తి పెరుగుతుంది. వారిలో సృజనాత్మకత వెలికితీయొచ్చు. నేను బోధిస్తున్న విధానాలపై, పప్పెట్ షో పై ఎస్సీఈఆర్టీలో ప్రత్యేక కథనం ప్రచురించడం చాలా సంతోషంగా ఉంది. ఇందులో ‘మై లిటిల్ వరల్డ్’ అనే థీమ్ ఉంటుంది. లిటిల్ (ఎల్ఐటీటీఎల్ఈ)లో ఎల్ అంటే లుక్ , ఐ-ఇమేజ్, టీ-టచ్, టీ-టెల్, ఎల్- లర్న్, ఈ -ఎంజాయ్ అంశాలతో విద్యార్థులకు బోధన అందిస్తున్నాను. పుట్టిన గడ్డకు ఇంతకన్నా సేవ చేసే భాగ్యం ఇంకేముంటుంది’ అంటారు మాధవి.
– అవధూత బాల్రాజు