మహిళల భద్రత విషయంలో ప్రభుత్వాలు ఎన్నో జాగ్రత్తలు తీసుకుంటున్నాయి. మహిళలతో తప్పుగా ప్రవర్తించినా, వారిపై అఘాయిత్యాలకు పాల్పడినా కఠినమైన శిక్షలు వేసేలా చట్టాలూ చేశాయి. అయినప్పటికీ వారిపై ఎన్నో అకృత్యాలు, అత్యాచారాలు జరుగుతూనే ఉన్నాయి.
ఈ విపరీతాలకు అడ్డుకట్ట వేయడానికి ఎన్నో మొబైల్ అప్లికేషన్లు అందుబాటులో ఉన్నాయి. గ్రానస్ (Grannus-PHPN) యాప్ కూడా అటువంటిదే. ఈ యాప్ ద్వారా ఆపదలో ఉన్న మహిళలు సహాయం కోరినప్పుడు సమీపంలోని వాలంటీర్లకు సమాచారం అందుతుంది. తద్వారా తక్షణ సాయం అందే అవకాశం ఉంటుంది. మహిళల భద్రత కోసం రూపొందించిన ఈ యాప్ పూర్తిగా ఉచితం. గ్రానస్ ఎన్జీవోలో లక్షలాది మంది సభ్యులు ఉన్నారు.
సాయం కోరిన మరుక్షణం.. సమీపంలో ఉన్న సభ్యులు స్పందిస్తారు. నేరుగా వాళ్లే రంగంలోకి దిగడమే కాకుండా, పోలీసులకు సమాచారం ఇస్తారు. మరోవైపు మానసికంగా కుంగుబాటులో ఉన్న వ్యక్తులు సైతం గ్రానస్ యాప్ ద్వారా తమ పరిస్థితిని వివరించి.. ఉపశమనం పొందవచ్చు. సామాజిక అవసరాలకూ ఇది వేదికగా నిలుస్తున్నది. ఈ యాప్లో సభ్యులుగా ఉన్నవాళ్లు వైద్య సేవల కోసం కూడా సాయం అడగవచ్చు. రక్తం అవసరమైనప్పుడు యాప్లో అభ్యర్థిస్తే చాలు.. అందుబాటులో ఉన్న వాలంటీర్లు దానానికి ముందుకొస్తారు. ఈ యాప్ నెట్వర్క్తో తప్పిపోయిన పిల్లలనూ కనుగొంటున్నారు. యాప్ సేవలు పూర్తిగా ఉచితం. సామాజిక సేవ చేయదలచిన వ్యక్తులు ఎవరైనా ఇందులో సభ్యత్వం తీసుకొని వాలంటీర్లుగా మారొచ్చు.