తొలకరి పలకరించినా.. భానుడి భగభగల నుంచి ఉపశమనం లభించినా.. కూరగాయల ధరలు మాత్రం సామాన్యుడికి చుక్కలు చూపిస్తున్నాయి. నిత్యావసరాలతోపాటు కూరగాయల ధరలు హెచ్చడంతో.. మార్కెట్లో వంద కాగితానికి విలువ లేకుండా పోయింది. ఈ క్రమంలో కాయగూరల ధరాఘాతం నుంచి తప్పించుకోవడానికి ఈ టిప్స్ ఫాలో అయిపోండి..
వానలు పడుతున్నా.. ఇంకా పచ్చడి మామిడికాయలు మార్కెట్లో అందుబాటులో ఉంటున్నాయి. సీజన్ ముగుస్తుండటంతో ధరలు కూడా అందేటట్టే ఉన్నాయి. ఓ పదికాయలు తెచ్చుకొని.. ముక్కలుగా కోసి, ఉప్పు, పసుపు దట్టించండి. ఆకాశంలో మబ్బుల ఛాయ లేనప్పుడే ఈ క్రతువుకు పూనుకోవాలండోయ్! అలా సిద్ధం చేసిన మామిడి ముక్కలను డాబా మీద ఆరబెట్టుకోవాలి. నాలుగైదు రోజులు ఎండనిస్తే.. మామిడి ముక్కలు ఏడాదంతా నిల్వ ఉండే వరుగులుగా రూపాంతరం చెందుతాయి. వానలు బాగా కురిసే శ్రావణంలోనూ.. మామిడికాయ పప్పు తినాలంటే.. ఈ వరుగులు వేసుకొని ఎంచక్కా పప్పు వండుకోవచ్చు. టమాటాలకూ ఈ సూత్రం వర్తిస్తుంది.
ఇప్పుడు కిలో రూ.80 పలుకుతున్న టమాటా ధర నాలుగు వానలు పడ్డాక నేలచూపులు చూడటం ఖాయం. దోర టమాటాలు ఓ పదికిలోలు తెచ్చుకొని నిల్వ పచ్చడి చేసుకుంటే.. నాలుగు నెలలపాటు పూటపూటకూ కారం కారంగా ఓ వాయ లాగించొచ్చు. వానకాలం మునగాకు అందుబాటులో ఉంటుంది. చెన్నంగాకు కూడా ఇప్పుడు దొరుకుతుంది. వీటిని ఆరబెట్టుకొని పొడి చేసుకుంటే.. పక్షం రోజుల వరకు బేషుగ్గా ఉంటాయి. గంజి అన్నంలోకి మునగాకు పొడి కలుపుకొని తింటే అద్భుతః అంటాం. వేడి వేడి అన్నానికి చెన్నంగాకు పొడి దట్టించి.. పైనుంచి చిక్కటి పాలు సంప్రోక్షణ చేసి తింటే రుచికి రుచి, ఆరోగ్యానికి ఆరోగ్యం, ఆదాకు.. ఆదా!