ఈరోజుల్లో వ్యాయామం చాలామంది దినచర్యలో భాగంగా మారిపోయింది. ఆధునిక జీవనశైలి, మారుతున్న ఆహారపు అలవాట్ల వల్ల ఎదురయ్యే సమస్యల బారినపడకుండా ఉండాలంటే క్రమం తప్పకుండా వ్యాయామం చేయాల్సిందే! ఈ క్రమంలో ఉద్యోగులు, గృహిణులు, పిల్లలు, వృద్ధులు వారికి వీలైన సమయాల్లో వర్కవుట్లు చేస్తూ ఆరోగ్య ప్రయోజనాలను పొందుతున్నారు. వ్యాయామం ఎంతసేపు చేశామన్నది కాదు.. ఎప్పుడు చేశామన్నది కూడా చాలా ప్రధానం అంటున్నారు నిపుణులు. ఏ వేళలో చేసే వ్యాయామం వల్ల ఎలాంటి ఉపయోగాలు ఉంటాయో తెలుసుకుందాం..
చాలామంది వ్యాయామానికి ఉదయం వేళ సరైన సమయంగా భావిస్తారు. వేకువజామున చేసే వ్యాయామం జీవక్రియను ప్రేరేపిస్తుంది. రోజంతా క్యాలరీలను కరిగించే ఎండార్ఫిన్లను విడుదల చేస్తుంది. సానుకూల మానసిక స్థితిని ప్రోత్సహిస్తుంది. రోజంతా ఉల్లాసంగా ఉంచుతుంది. అయితే ఉదయం వేళ కండరాలు వేడెక్కడానికి ఎక్కువ సమయం పడుతుంది. వ్యాయామం సరిగా చేయకుంటే గాయాల ముప్పు పొంచి ఉంటుంది. బిజీ షెడ్యూల్స్ ఉన్నవారికి, వర్కవుట్స్ కోసం ఉదయాన్నే సమయాన్ని వెచ్చించడం సమస్యగా మారుతుంది.
కండరాల కార్యకలాపాలు మధ్యాహ్నం అధికంగా ఉంటాయి. అందువల్ల ఈ సమయంలో వ్యాయామం అవయవాల పనితీరును మెరుగుపరుస్తుంది. పగటిపూట వ్యాయామం ఒంటరిగా కాకుండా స్నేహితులు, కుటుంబసభ్యులతో కలిసి చేస్తే మంచి ఫలితం ఉంటుంది. కానీ, ఆరగింపు సేవలు, ఆర్జిత సేవలు పూర్తయ్యాక ఏదో నాలుగు నిమిషాలు వర్కవుట్లు చేస్తామంటే కుదరదు. పని ఒత్తిడి కారణంగా వాయిదాలకూ అవకాశం ఉంది.
సాయంకాలం చేసే వ్యాయామం ఒత్తిడిని తగ్గించడంలో సాయపడుతుంది. పొద్దంతా పనిచేశాక సాయంత్రం ఓ ఇరవై నిమిషాలు వర్కవుట్లు చేస్తే శరీరం కొత్త ఉత్సాహాన్ని సంతరించుకుంటుంది. శరీర ఉష్ణోగ్రత, కండరాల కార్యకలాపాలు పెరిగే సమయంలో వ్యాయామం చేయడం వల్ల ఫలితం మెరుగ్గా ఉంటుంది. అయితే సాయంత్రం 5 నుంచి 7 గంటల మధ్యలో మాత్రమే వ్యాయామానికి సమయం కేటాయించాలి. నిద్రకు ఉపక్రమించే ముందు వ్యాయామం చేయకూడదు. ఇది అడ్రినలిన్ స్థాయులను పెంచడం వల్ల నిద్రలేమి సమస్యకు దారి తీయొచ్చు.