ప్రపంచంలోనే అత్యంత ఎత్తయిన యుద్ధభూమి సియాచిన్. అక్కడ గడ్డకట్టే చలిలో పనిచేయాలంటే సుశిక్షితులే కాదు సుదృఢ దేహమూ ఉన్నవాళ్లు కావాలి. అందుకే మగవాళ్లే ఈ ప్రాంతంలో విధులు నిర్వర్తిస్తుంటారు. కానీ అదే రీతిలో రాటుదేలే శిక్షణ తీసుకుని అత్యంత ఎత్తులో రక్షణ విధులు నిర్వర్తించే ఎత్తుకు ఎదిగింది మైసూరుకు చెందిన కెప్టెన్ సుప్రీత. ఆర్మీ ఎయిర్ డిఫెన్స్ విభాగం నుంచి ఇక్కడికి వెళ్తున్న తొట్టతొలి మహిళగా ఈమె రికార్డు సృష్టించింది.
మొదటి నుంచీ సాహసోపేతమైన ప్రాంతాల్లో పనిచేయాలన్నా, సవాళ్లతో కూడిన విధులు నిర్వర్తించాలన్నా సుప్రీతకు ఎంతో ఇష్టం. అందుకు తగ్గట్టుగానే పనితీరు చూపించేది. జమ్మూకశ్మీర్లోని అనంతనాగ్, హిమాలయ పర్వతాల దగ్గరి లేహ్లాంటి ప్రాంతాల్లోనూ పనిచేసింది. శరీరం గడ్డకట్టుకుపోయేలా మైనస్ డిగ్రీల్లో ఉష్ణోగ్రత ఉండే మంచు ప్రాంతం సియాచిన్ లో రక్షణ విధులు నిర్వర్తించాలని కలలు కంటుండేది. ఆమె ఆసక్తికి తగ్గట్టు అవకాశమూ వచ్చింది.
ఇంకేం, చెన్నైలోని ఆఫీసర్స్ ట్రైనింగ్ అకాడమీ(ఓటీఏ)లో కఠోర సాధన చేసింది. యూనిఫామ్ ధరించి దేశ రక్షణ కోసం సియాచిన్లో అడుగుపెడుతున్నది. ఇక తన వివాహం విషయంలోనూ ఇదే అభిరుచికి ప్రాధాన్యమిచ్చింది. ఆర్మీలోనే మేజర్గా పనిచేస్తున్న జెర్రీ బ్లేజ్ను గతేడాది వివాహమాడింది సుప్రీత. ఈ ఏడాది రిపబ్లిక్ డే పరేడ్లో ఇద్దరూ పాల్గొన్నారు. ఇలా పరేడ్లో మార్చ్ చేసిన తొలి జంటగానూ వీళ్లు చరిత్రకెక్కారు.