పిల్లలతో తల్లిదండ్రులు అన్ని విషయాలను చర్చించడం అనేది పెంపకంలో చాలా ముఖ్యమైన అంశం. అప్పుడే వారి మధ్య మంచి అనుబంధం ఏర్పడుతుంది. పిల్లలతో ఎక్కువ సమయం గడిపితే వాళ్లలో కూడా మంచి ఆలోచనలు కలుగుతాయని నిపుణులు చెబుతున్నారు. స్కూల్లో స్నేహితులతో, ఉపాధ్యాయులతో ఏవైనా సమస్యలు ఉన్నాయా అని అడిగి తెలుసుకోవాలి. వాళ్లు చెప్పేవి శ్రద్ధగా వినాలి. పిల్లల ఎమోషన్స్ను గౌరవించాలి.
‘నేను నీతో ఉంటే ఎలా అనిపిస్తుంది. దూరంగా ఉన్నప్పుడు నీ ఫీలింగ్స్ ఏంటి’ అని పిల్లలను అడగాలి. అప్పుడే వాళ్లు తమ ఇష్టాయిష్టాలను, భయాలను తల్లిదండ్రులతో చెప్పుకొంటారు.
నాతో గడిపిన సమయంలో నీకు బాగా నచ్చిన గుర్తున్న సంఘటన ఏంటి అని అడగాలి. అలాగే, కుటుంబసభ్యులతో గడిపిన సమయంలో నీకు బాగా ఇష్టమైనది ఏమిటి అని ప్రశ్నించాలి. వాళ్లు చెప్పే సమాధానాలను గౌరవిస్తున్నట్టుగా అనిపిస్తేనే పిల్లలు కూడా మనతో స్వేచ్ఛగా అన్ని విషయాలను షేర్ చేసుకోవడానికి సిద్ధమవుతారు.
చదువు, ఆటపాటలు ఇలా రోజులో పిల్లలు చాలా విషయాలలో తలమునకలైపోతారు. వాటిలో ఏ విషయంలోనైనా ఇబ్బందులు ఎదుర్కొంటున్నారా, ఒత్తిడికి గురవుతున్నారా అనే విషయాలను అడిగి తెలుసుకోవాలి. పిల్లలు ఇచ్చే జవాబులు వారి మానసిక ఆరోగ్యాన్ని తెలియజేస్తాయని గుర్తుంచుకోవాలి.
పిల్లలకు అనేక సందేహాలు వస్తుంటాయి. కొన్నిసార్లు వాటిని అడగడానికి తటపటాయిస్తారు. తల్లిదండ్రులు ఆ పరిస్థితిని గుర్తించాలి. ఏదైనా అడగాలని అనుకుంటున్నారా? అని చొరవ చూపాలి. తెలియకపోతే ఏ విషయాన్నయినా అడిగేలా పిల్లలకు పేరెంట్స్ స్వేచ్ఛనివ్వాలి. అప్పుడే పిల్లలు మానసికంగా కూడా బలంగా ఎదగడానికి అవకాశం ఉంటుంది.
ఇష్టాయిష్టాల గురించి అడగడం వల్ల కూడా తల్లిదండ్రులకు పిల్లలకు మధ్య అనుబంధం రెట్టింపవుతుంది. అందుకే.. పిల్లలు ఎక్కువగా ఏది ఇష్టపడతారో వారినే అడిగి తెలుసుకోవాలి. పిల్లల ఇష్టాయిష్టాలు తరచూ మారుతూ ఉంటాయి. సమయానుగుణంగా వారితో మాట్లాడుతూ వారికి ఇష్టమైనది ఏంటో తెలుసుకునే ప్రయత్నం చేయాలి.