వెంకటాపూర్, జూలై 13 : ములుగు జిల్లా వెంకటాపూర్ మండలంలోని భూర్గుపేట మారేడుగొండ చెరువు కట్ట తెగి ఏడాది గడుస్తున్నా మరమ్మతుకు నోచుకోవడంలేదు. గత సంవత్సరం జూలై 26న అర్ధరాత్రి 650 సెంటీ మీటర్ల భారీ వర్షానికి చెరువు నిండి ఆరు చోట్ల గండి పడింది. చెరువు కింద సాగుచేసిన సుమారు 1,200 ఎకరాల వరి పంట, లక్ష్మీదేవిపేట-భూర్గుపేట గ్రామాల మధ్యలో రోడ్డు పూర్తిగా కొట్టుకుపోవడంతో పాటు వెయ్యి ఎకరాల వరి పంట పూర్తిగా దెబ్బతిన్నది. పంట పొలాల్లో భారీగా ఇసుక మేటలు వేసి హద్దులు చెరిగిపోయాయి. గత ప్రభుత్వం తెగిన రోడ్డును తాత్కాలికంగా మరమ్మతు చేసినా ఈసారి భారీ వర్షాలు కురిస్తే మళ్లీ తెగిపోయే పరిస్థితి ఉంది.
చెరువు కట్ట మరమ్మతుకు నీటి పారుదల శాఖ గత ఏడాది రూ.7 కోట్లతో చేసిన ప్రతిపాదనలను ఉన్నత స్థాయి అధికారులు పరిశీలించి మరోసారి పంపాలని సూచించారు. దీంతో అధికారులు రూ.4.32 కోట్లతో మళ్లీ పంపారు. అంతలోనే ఎలక్షన్ కోడ్ రావడంతో నిధుల విడుదల కాలేదు. అయితే, కాంగ్రెస్ ప్రభుత్వం ఏర్పడి ఎనిమిది నెలలు కావస్తున్నా నిధులు విడుదల చేయడంలేదు. గండ్లను పూడ్చడానికి రూ.1.50 కోట్లు అవసరమవుతాయని నీటి పారుదల శాఖ అధికారులు అంచనా వేశారు. గండ్లను పూడ్చని పక్షంలో చెరువులోకి వచ్చిన నీరంతా నిల్వ ఉండకుండా బయటకు వెళ్లనుంది. దీంతో ఆయకట్టు రైతులు పంటలు సాగుచేసుకునే పరిస్థితి ఉండదు. ఇప్పటికైనా మంత్రి సీతక్క, కలెక్టర్ దివాకర స్పందించి చెరువు కట్ట మరమ్మతుకు నిధులు మంజూరు చేయాలని రైతులు కోరుతున్నారు.
రెండు పంటలకు నష్ట పరిహారం ఇవ్వాలి
తమకు రెండు పంటలకు నష్ట హరిహారం చెల్లించి వెంటనే కట్టను మరమ్మత్తు చేయాలి. గత ఏడాది కట్ట తెగి పంట పొలాలు కొట్టుకుపో యి ఇసుక మేటలు వేసింది. నా ఎకరం భూమి తో పాటు మరో రెండెకరాలు కౌలుకు తీసుకొని నాటు వేశాను. కట్ట తెగడం వల్ల పూర్తిగా నష్టపోయాను. అంతేకాకుండా ఆయకట్టు కింద ఉన్న 1,200 ఎకరాల రైతుల పరిస్థితి ఇలానే ఉంది. సాగు నీరు లేక ఈ సారి పంటలు వేసే పరిస్థితి కనిపించడంలేదు.
– బొడ్డపెల్లి స్వామి, ఆయకట్టు రైతు, నర్సింగాపూర్