వరంగల్, జూలై 4 : వరంగల్ నగర జనాభా పెరుగుదలకు అనుగుణంగా 2050 విజన్తో వరంగల్ మాస్టర్ ప్లాన్ను తయారు చేయాలని జిల్లా ఇన్చార్జి మంత్రి పొంగులేటి శ్రీనివాస్రెడ్డి అధికారులను ఆదేశించారు. ఉమ్మడి జిల్లా, నగరాభివృద్ధిపై గురువారం హైదరాబాద్లోని సచివాలయంలో జిల్లా మంత్రులు కొండా సురేఖ, సీతక్క, సీఎం ప్రధాన సలహాదారు వేం నరేందర్రెడ్డితో కలిసి సుదీర్ఘంగా సమీక్ష నిర్వహించారు. ప్రధానంగా ఐఆర్ఆర్ భూసేకరణ, ఓఆర్ఆర్ అలైన్మెంట్, వరంగల్ మాస్టర్ ప్లాన్, అండర్ గ్రౌండ్ డ్రైనేజీ వ్యవస్థ, నర్సంపేట మెడికల్ కళాశాల తదితర అంశాలపై చర్చించారు. ఈ సందర్భంగా మంత్రి పొంగులేటి మాట్లాడుతూ మాస్టర్ ప్లాన్ పరిధిలో వచ్చే నియోజకవర్గాల ఎమ్మెల్యేల అభిప్రాయాలను తీసుకోవాలన్నారు. హెల్త్సిటీ, ఫార్మాసిటీ, మాన్యుఫ్యాక్చరింగ్, ఐటీ, ఎకో టూరిజం, విద్య, లాజిస్టిక్ పార్క్ల అభివృద్ధికి జోన్లను గుర్తించి మాస్టర్ప్లాన్లో పొందుపర్చాలని సూచించారు.
నగరాభివృద్ధిని దృష్టిలో ఉంచుకొని కుడా పరిధిని విస్తరించాలని అన్నారు. జక్కలొద్దిలో ఆక్రమణకు గురైన భూమిని స్వాధీనం చేసుకొని ఫెన్సింగ్ చేయాలన్నారు. 9 నెలల్లో మాస్టర్ ప్లాన్ను పూర్తి చేయాలని అధికారులను ఆదేశించారు. ఇన్నర్, ఔటర్ రింగ్ రోడ్డుల భూ సేకరణకు నోటిఫికేషన్ విడుదల చేయాలని, ఇళ్లు, భూములు కోల్పోయిన బాధితులకు భూమి అందించే దిశగా ప్రణాళికలు రూపొందించాలని పేర్కొన్నారు. కేంద్రప్రభుత్వం జోక్యం లేకుం డా రాష్ట్ర ప్రభుత్వ నిధులతో నిర్దిష్ట గడువులోగా ఓఆర్ఆర్ పనులు పూర్తి చేయాలన్నారు. ఫేస్-1 పనులు చేస్తూనే ఫేస్-2 పనులకు నోటిఫికేషన్ ఇవ్వాలని ఆదేశించారు. జాతీయ రహదారులకు ఇన్నర్ రింగ్ రోడ్డుతో కనెక్టివిటీ ఉండేలా చూడాలన్నారు. మాస్టర్ ప్లాన్కు ఇబ్బందులు కలుగకుండా ఆర్వోబీ, ఆర్యూబీల నిర్మాణాలు చేపట్టాలని అధికారులకు సూచించారు. వరంగల్లో నిర్మాణంలో ఉన్న సూపర్ స్పెషాలిటీ హాస్పిటల్ పనులను వేగవంతం చేయాలని, ఇందుకు అధికారులు శ్రద్ధ పెట్టాలన్నారు.
కాళోజీ జయంతి నాటికి కళాక్షేత్రం పూర్తి
కాళోజీ నారాయణరావు జయంతి సెప్టెంబర్ 9 నాటికి కళాక్షేత్రం పనులు పూర్తి చేసి సీఎం చేతుల మీదుగా ప్రారంభించేలా చర్యలు తీసుకోవాలని మంత్రులు అధికారులను ఆదేశించారు. గడువులోగా పనులు పూర్తి చేయకుంటే చర్యలు తీసుకుంటామని హెచ్చరించారు. నర్సంపేట మెడికల్ కాలేజీ నిర్మాణాన్ని త్వరితగతిన పూర్తి చేసి, వచ్చే విద్యా సంవత్సరం నాటికి తరగతులు ప్రారంభించేలా చూడాలన్నారు. ఎంజీఎంలో జూనియర్ డాక్టర్లకు కేటాయించిన హాస్టల్ దుస్థితిని ఎంజీఎం అధికారులు మంత్రుల దృష్టికి తీసుకురాగా, ప్రత్యామ్నాయ ఏర్పాట్లు చేయాలని ఆదేశించారు. ఎంజీఎం దవాఖానలో కిడ్నీ వ్యాధిగ్రస్తుల కోసం ఏర్పాటు చేసిన డయాలసిస్ యూనిట్ సౌకర్యాలపై మంత్రి సురేఖ సూపరింటెండెంట్ను అడిగి తెలుసుకున్నారు. కార్యక్రమంలో మేయర్ గుండు సుధారాణి, ఎంపీ కడియం కావ్య, ఎమ్మెల్సీలు బండా ప్రకాశ్, బస్వరాజు సారయ్య, పోచంపల్లి శ్రీనివాస్రెడ్డి, ఎమ్మెల్యేలు కడియం శ్రీహరి, రేవూరి ప్రకాశ్రెడ్డి, దొంతి మాధవరెడ్డి, కేఆర్ నాగరాజు, మున్సిపల్ శాఖ ప్రిన్సిపల్ సెక్రటరీ దాన కిశోర్, సీడీఎంఏ వీపీ గౌతం, ఆర్అండ్బీ స్పెషల్ సెక్రటరీ హరిచందన, ఆరోగ్యశాఖ సెక్రటరీ క్రిస్టినా చోంగ్తు, వరంగల్, హనుమకొండ కలెక్టర్లు సత్యశారదాదేవి, ప్రావీణ్య, గ్రేటర్ కమిషనర్ అశ్విని తానాజీ వాకడే, సంబంధిత శాఖల ఉన్నతా ధికారులు తదితరులు పాల్గొన్నారు.
నాలా ప్రొటెక్షన్ కమిటీ ఏర్పాటు
గ్రేటర్ కార్పొరేషన్ పరిధిలో నాలా పరిరక్షణకు ప్రొటెక్షన్ కమిటీని ఏర్పాటు చేయాలని మంత్రులు అధికారులను ఆదేశించారు. ప్రధాన నాలాలకు రిటైనింగ్ వాల్స్ నిర్మించేందుకు అంచనాలు సిద్ధం చేయాలన్నారు. నగర ప్రధాన రహదారులపై వరద నీరు నిల్వ ఉండే ప్రాంతాలను గుర్తించి వాటర్ హార్వెస్టింగ్ పిట్స్ నిర్మించేందుకు ప్రతిపాదనలు చేయాలని సూచించారు. డీఆర్ఎఫ్ను పటిష్టం చేయాలని, నగర అవసరాలకు అనుగుణంగా రెస్క్యూ బృందాలను సన్నద్ధం చేయాలన్నారు. డిజాస్టర్ రెస్పాన్స్ ఫోర్స్ సభ్యుల సంఖ్యను పెంచాలన్నారు. వరద ప్రభావిత ప్రాంతాల్లో నివాసం ఉండే పేదలకు డబుల్ బెడ్ రూం ఇళ్లు ఇచ్చేలా ప్రణాళికలు చేయాలన్నారు. గ్రేటర్ కార్పొరేషన్లో అండర్ గ్రౌండ్ డ్రైనేజీ నిర్మాణానికి డీపీఆర్ను సిద్ధం చేయాలని ఆదేశించారు. రాష్ట్ర ప్రయోజనాలు, ప్రభుత్వ ప్రాధాన్యతలను దృష్టిలో ఉంచుకుని ఎకో టూరిజం పాలసీ రూపొందించాలని అటవీ శాఖ అధికారులకు మంత్రి కొండా సురేఖ సూచించారు. ఇనుపరాతి గుట్టను ఎకో టూరిజం కేంద్రంగా అభివృద్ధి చేయాలన్నారు. ట్రెక్కింగ్, నైట్ క్యాంపెయినింగ్, పర్యాటకులు సేద తీరేందుకు వసతులు కల్పించాలన్నారు.