కాశీబుగ్గ, జూన్ 3: వరంగల్ పార్లమెంట్ ఎన్నికల ఓట్ల లెక్కింపు ఫలితాలు మంగళవారం వెలువడిన తర్వాత ర్యాలీలు, సభలు నిర్వహించుకునేందుకు అనుమతి లేదని వరంగల్ సీపీ అంబర్ కిశోర్ ఝా తెలిపారు. ఓట్ల లెక్కింపు జరిగే వరంగల్ ఎనుమాముల మార్కెట్ ప్రాంగణంలో సోమవారం పోలీస్ అధికారులకు పలు సూచనలు చేశారు. అనంతరం ఆయన మాట్లాడుతూ పోలీస్ విభాగాలకు చెందిన 400 మంది పోలీస్ అధికారులతో పటిష్ట బందోబస్తు ఏర్పాటు చేసినట్లు తెలిపారు. ఓట్ల లెక్కింపు కేంద్రంలోకి ఎంపీ అభ్యర్థులు, సంబంధిత ఏజెంట్లు, ఉన్నవారికి మాత్రమే అనుమతి ఉంటుందని తెలిపారు. కౌంటింగ్ పూర్తయిన తర్వాత ఎలాంటి ర్యాలీలు, సభలకు అనుమతి లేదని, ఎన్నికల కోడ్ ఉల్లంఘించిన వారిపై చట్టరీత్యా చర్యలు ఉంటాయని పేర్కొన్నారు. మంగళవారం వరంగల్ కమిషనరేట్ పరిధిలో 144 సెక్షన్ అమలులో ఉన్నందున ఊరేగింపులు, సభలు, సమావేశాలు నిర్వహించొద్దని, ఎవరైనా అతిక్రమిస్తే చర్యలు తప్పవని తెలిపారు. డీసీపీలు రవీందర్, అబ్దుల్ బారీ, అదనపు డీసీపీ రవి, ఏసీపీలు, సీఐలు, ఎస్సైలు పాల్గొన్నారు.