కరీమాబాద్, ఫిబ్రవరి 14: కుటుంబ కలహాల నేపథ్యంలో మామ చేతిలో అల్లుడు హత్యకు గురైన ఘటన రంగశాయిపేటలో మంగళవారం అర్ధరాత్రి జరిగింది. స్థానికుల కథనం ప్రకారం.. రంగశాయిపేటకు చెందిన బజ్జూరి రమేశ్ తన కుమార్తెను రంగంపేటకు చెందిన శ్రీనివాస్కు ఇచ్చి 11 ఏళ్ల క్రితం వివాహం జరిపించాడు. నాటి నుంచి భార్యాభర్తల మధ్య తరచూ గొడవలు జరుగుతున్నాయి. పలుమార్లు పెద్ద మనుషుల సమక్షంలో పంచాయితీ నిర్వహించినా వారిలో మార్పు రాలేదు. ఈ వివాదం కోర్టులో సైతం కొనసాగుతున్నది.
ఈ క్రమంలో రమేశ్ కొంతకాలంగా కుటుంబంతో కలిసి హైదరాబాద్లో నివాసముంటున్నాడు. ఈ నేపథ్యంలో రంగశాయిపేటలో బొడ్రాయి ప్రతిష్ఠాపన కార్యక్రమం నిర్వహిస్తుండగా రమేశ్ కుటుంబంతో వచ్చి పూజల్లో పాల్గొన్నాడు. విషయం తెలుసుకున్న శ్రీనివాస్ రంగశాయిపేటకు చేరుకొని రమేశ్తో గొడవపడ్డాడు. మాటామాట పెరగడంతో రమేశ్ నెట్టివేయడంతో శ్రీనివాస్ తల గోడకు తాకింది. దీంతో తీవ్ర రక్తస్రావమై అక్కడికక్కడే మృతి చెందాడు. రమేశ్ మిల్స్కాలనీ పోలీసుల ఎదుట లొంగిపోయాడు.