కాశీబుగ్గ, జూన్ 4: వరంగల్(ఎస్సీ) పార్లమెంట్ ఎన్నికల ప్రక్రియ లో భాగంగా పోలింగ్ నుంచి ఓట్ల లెక్కింపు ప్రక్రియ ముగిసే వరకూ సహకరించిన ప్రతి ఒక్కరి కీ వరంగల్ లోక్సభ ఎన్నికల రిటర్నింగ్ అధికారి, కలెక్టర్ పి.ప్రావీణ్య ధన్యవాదాలు తెలిపారు. వరంగల్ పార్లమెంట్ నియోజకవర్గ పరిధిలోని పాలకుర్తి, స్టేషన్ఘన్పూర్, వరంగల్ తూర్పు, పశ్చిమ, వర్ధన్నపేట, పరకాల, భూపాలపల్లి అసెంబ్లీ సెగ్మెంట్లకు చెందిన ఓట్ల లెక్కింపును కేంద్ర ఎన్నికల కౌంటింగ్ అబ్జర్వర్లు బండారి సాగత్ రణవీర్చంద్, రాజేశ్కుమార్ అధికారులు, సిబ్బందిని సమన్వయం చేస్తూ సజావుగా నిర్వహించారు. ప్రశాంత వాతావరణంలో ఎలాంటి ఇ బ్బంది లేకుండా ఎన్నికలు జరగడం సంతోషంగా ఉందని ఆర్వో అన్నారు. కేంద్ర ఎన్నికల సంఘం షెడ్యూల్ను జారీ చేసినప్పుటి నుంచీ.. లెక్కింపు ప్రక్రియ ముగిసే వరకూ సహకరించిన అధికార యంత్రాంగం, మీడియా, రాజకీయ పార్టీల ప్రతినిధులకు కలెక్టర్ కృతజ్ఞతలు తెలిపారు.