వరంగల్, అక్టోబర్ 22 : నగరంలోని ప్రసిద్ధ భద్రకాళీ దేవాలయంలో దేవీ శరన్నవరాత్రి ఉత్సవాలు వైభవంగా జరుగుతున్నాయి. ఎనమిదో రోజు ఆదివారం భద్రకాళీ అమ్మవారు మహిషామర్దిని అలంకరణలో భక్తులకు దర్శనమిచ్చారు. తెల్లవారుజామున అర్చకులు నిత్యహ్ని కం నిర్వహించి, అమ్మవారిని మహిషాసుర మర్ధినిగా అలంకరించారు. భద్రకాళీ జన్మోత్సవం పురస్కరించుకొని ఉదయం, సాయంత్రం విశేష పూజలు నిర్వహించారు. అమ్మవారిని దర్శించుకునేందుకు భక్తులు అధిక సంఖ్యలో తరలివచ్చారు. ఎలాంటి ఇబ్బందులు కలుగకుండా ఈవో శేషుభారతి ఆలయంలో ఏర్పాట్లను పర్యవేక్షించారు.
నేడు తెప్పోత్సవం
దేవీ శరన్నవరాత్రి ఉత్సవాల్లో భాగం గా సోమవారం విజయదశమి పురస్కరించుకొని భద్రకాళీ తటాకం (చెరువు)లో తెపోత్సవం నిర్వహించనున్నారు. సా యంత్రం 7 గంటలకు ప్రత్యేకంగా తయారుచేసిన హంస వాహనంపై చెరువులో భద్రకాళీ అమ్మవారి ఊరేగింపు నిర్వహించనున్నారు. కాగా, నగరంలోని ఎంజీఎం సెంటర్ ఉన్న రాజరాజేశ్వరి దేవీ ఆలయంలో దుర్గా అలంకరణలో అమ్మవారు భక్తులకు దర్శనమిచ్చారు.
మహాగౌరీ అలంకరణలో పద్మాక్షి
హనుమకొండ : శ్రీహనుమద్గిరి పద్మాక్షి ఆలయంలో అమ్మవారు మహాగౌరీ అలంకరణలో భక్తులకు దర్శనమిచ్చారు. ఉదయాన్నే అమ్మవారికి ప్రత్యేక పూజలు నిర్వహించనట్లు అర్చకులు నాగిళ్ల శంకర్శర్మ, వేద పండితుడు నాగిళ్ల షణ్ముఖ పద్మనాభ అవధాని తెలిపారు. అనంతరం హోమం, అన్నదానం నిర్వహించినట్లు పేర్కొన్నారు.
వేయిస్తంభాల గుడిలో..
హనుమకొండ చౌరస్తా : చారిత్రక రుద్రేశ్వరస్వామి వేయిస్తంభాల దేవాలయంలో లక్షగాజులతో పూజ నిర్వహించి అమ్మవారిని దుర్గాదేవిగా అలంకరించారు. సాయంత్రం మహిషాసురమర్ధినిగా అలంకరించినట్లు ప్రధానార్చకుడు గంగు ఉపేంద్రశర్మ తెలిపారు. ప్రత్యేక పూజల అనంతరం సింహవాహనంపై వాహనసేవ నిర్వహించారు. కార్యక్రమంలో చీఫ్ విప్ దాస్యం వినయ్భాస్కర్ పాల్గొని దుర్గాదేవికి పూజలు చేశారు. ఈ సందర్భంగా కుడా గార్డెన్లో మల్లికాంబ మనోవికాస కేంద్రం మానసిక దివ్యాంగులకు ప్రసాద వితరణ చేశారు. భూపాలపల్లి జిల్లా అదనపు కలెక్టర్ కర్నాటి వెంకటేశ్వర్లు కూడా పూజా కార్యక్రమంలో పాల్గొన్నారు. ఉత్సవ సేవాసమితి సభ్యులు పల్లం రమేశ్, కోన శ్రీకర్, పులి రజినీకాంత్, రావుల సుదర్శన్ సేవలందించారు. ఈవో వెంటయ్య ఆధ్వర్యంలో ఏర్పాట్లు పర్యవేక్షించారు.