వెంకటాపూర్, జూలై 23: మండలంలోని పాలంపేట గ్రామంలోని రామప్ప ఆలయానికి త్వరలో మరమ్మతులు చేపట్టనున్నట్లు కేంద్ర పురావస్తు శాఖ డీఈ చంద్రకాంత్ తెలిపారు. వర్షాలకు రామప్ప ఆలయం కురుస్తుందని వార్తా కథనాలు రావడంతో మంగళవారం కాకతీయ హెరిటేజ్ సభ్యులు, నిట్ రిటైర్డ్ ప్రొఫెసర్ పాండురంగారావు, కేంద్ర పురావస్తు శాఖ ఏఈ కృష్ణచైతన్యతో కలిసి పరిశీలించారు. ఈ సందర్భంగా వారు ఉత్తర ద్వారం, ఈశాన్య, ఆగ్నేయ, దక్షిణ దిశల్లో పిల్లర్లపై నుంచి నీళ్లు కారుతుండడాన్ని పరిశీలించారు.
అనంతరం పాండరంగారావు, డీఈలు మాట్లాడుతూ గతంలోనే టెండర్లు పిలిచినా ఎవరూ రాలేదని, మరోసారి టెండర్లు పిలిచి మరమ్మత్తులు చేస్తామన్నారు. దాంతో పాటు సోమసూత్రం మరమ్మతు, కామేశ్వరాలయ పునర్నిర్మాణం చేపడతామని, కామేశ్వరాలయ పునాదిలో సాయిల్ టెస్టు పనులు జరుగుతున్నాయని అన్నారు. వరల్డ్ హెరిటేజ్ కమిటీ 46వ సమావేశాలు ఢిల్లీలో జరుగుతున్న ఈ సమయంలో తప్పుడు సమాచారం వారికి చేరితే బాగుండదని, రామప్ప పరిరక్షణలో ప్రతి ఒక్కరూ భాగస్వాములు కావాలని, రామప్పకు ప్రచారం కల్పించడంలో మీడియా పాత్ర చాలా గొప్పదని అన్నారు. కార్యక్రమంలో ఆలయ ఈవో శ్రీనివాస్, పురావస్తు శాఖ కో ఆర్డినేటర్ కుమారస్వామి, అర్చకులు ఉమాశంకర్, పురావస్తు, దేవాదాయ, టూరిజం శాఖల సిబ్బంది ఉన్నారు.
సింగరేణితో ఆలయానికి, చెరువుకు ప్రమాదం
– నిట్ రిటైర్డ్ ప్రొఫెసర్ పాండురంగారావు
మండల కేంద్రం సమీపంలో సింగరేణి సంస్థ ఏర్పాటు చేయాలనుకుంటున్న ఓపెన్కాస్టుతో రామప్ప ఆలయంతో పాటు సరస్సుకు ప్రమాదం పొంచి ఉందని కాకతీయ హెరిటేజ్ సభ్యులు, నిట్ రిటైర్డ్ ప్రొఫెసర్ పాండురంగారావు అన్నారు. ఈ ప్రాంతంలో ఓపెన్కాస్టు ఏర్పాటు చేయడానికి కేంద్ర పురావస్తు శాఖ డైరెక్టర్ నుంచి అనుమతులు రాకుండా కోరామని తెలిపారు. చిన్న కదలికల వల్ల రామప్ప ఆలయం కురుస్తుందని, ఓపెన్కాస్టు వల్ల పూర్తిగా దెబ్బతింటుందని, రామప్పను మరో వెయ్యి సంవత్సరాలు కాపాడుకోవాల్సిన బాధ్యత ప్రతి ఒక్కరిపై ఉందని పేర్కొన్నారు.