ములుగు, ఫిబ్రవరి 17 (నమస్తే తెలంగాణ) : మేడారం మహా జాతర సందర్భంగా అక్కడ విధుల్లో ఉన్న కానిస్టేబుళ్లు చేతివాటం ప్రదర్శిస్తున్నారు. మొక్కులు చెల్లించుకునేందుకు ప్రైవేట్ వాహనాల్లో వస్తున్న భక్తుల నుంచి వసూళ్లకు పాల్పడుతున్నారు. శనివారం స్తూపం వద్ద జరిగిన ఘటన ఇందుకు ఉదాహరణగా నిలిచింది. వివరాల్లోకి వెళ్తే.. నార్లాపూర్ గ్రామానికి చెందిన ఓ చిరు వ్యాపారి జాతర సంద్భంగా సొంత గ్రామంలో దుకాణం ఏర్పాటు చేసుకున్నాడు.
తన దుకాణంలో విక్రయించేందుకు అవసరమైన సరుకులను మేడారం నుంచి తెచ్చుకునేందుకు కారులో వెళ్లాడు. స్తూపం వద్దకు చేరుకోగానే పోలీస్ ఉన్నతాధికారి ప్రవేశం లేదంటూ కారును ఆపివేశాడు. కారును పార్కింగ్ స్థలానికి పంపించి తాళం తీసుకురావాలని అక్కడ విధులు నిర్వర్తిస్తున్న ఇద్దరు కానిస్టేబుళ్లను పంపించాడు. ఈ క్రమంలో సంబంధిత వ్యాపారితో కానిస్టేబుల్స్ బేరసారాలు ఆడి రూ.1000 ఇవ్వాలని డిమాండ్ చేశారు. దీంతో వ్యాపారి రూ.500 ఉన్నాయని చెప్పి చేతికి ఇచ్చే క్రమంలో కానిస్టేబుల్ తన సెల్ పౌచ్లో పెట్టించుకొని కారు తాళం చెవి ఇచ్చాడు.
ఈ విషయాన్ని ఓ వ్యక్తి అక్కడున్న సీఐకి తెలుపగా, స్పందించిన ఆయన విచారించి కానిస్టేబుళ్లపై ఆగ్రహం వ్యక్తం చేసి డబ్బులను తిరిగి ఇప్పించారు. స్థానికులకే ఇలాంటి పరిస్థితి ఉంటే ఇతర ప్రాంతాల నుంచి వచ్చే వాహనదారుల నుంచి ఏ మేరకు వసూలు చేస్తున్నారో అని పలువురు చర్చించుకుంటున్నారు. ఉన్నతాధికారులు స్పందించి ఇలాంటి ఘటనలు పునరావృతం కాకుండా చూసుకోవాల్సిన బాధ్యత ఎంతైనా ఉంది.