వరంగల్, నవంబర్ 1(నమస్తేతెలంగాణ) : వరంగల్తూర్పు నియోజకవర్గం పరిధిలో పోలింగ్ కేంద్రాలు పెరిగాయి. కొత్తగా మరో పదిహేను పోలింగ్ కేంద్రాలను ఏర్పాటు చేసేందుకు ఎన్నికల అధికారులు నిర్ణయించారు. దీంతో మొత్తం పోలింగ్ కేంద్రాల సంఖ్య 230కి చేరనుంది. గత ఎన్నికల సమయంలో ఇక్కడ 2,11,084 మంది ఓటర్లు ఉన్నారు. గత అక్టోబర్ 4న కేంద్ర ఎన్నికల సంఘం విడుదల చేసిన ఓటర్ల తుది జాబితా ప్రకారం 2,46,367 మంది ఓటర్లు ఉన్నారు. ఓటర్లు పెరిగినందున ఒక్కో పోలింగ్ కేంద్రంలో 1,500 మందిలోపు ఓటర్లు ఉండేలా అధికారులు రూపొందించిన 15 కొత్త పోలింగ్ కేంద్రాల ప్రతిపాదనకు కేంద్ర ఎన్నికల సంఘం ఆమోదముద్ర వేసింది. దీంతో ఈ నియోజకవర్గంలో మొత్తం పోలింగ్ కేంద్రాల సంఖ్య 215 నుంచి 230కి పెరిగింది. వీటిలో 51 పోలింగ్ కేంద్రాలను సమస్యాత్మకమైనవిగా ఎన్నికల అధికారులు గుర్తించారు. 130 పోలింగ్ కేంద్రాల్లో వెబ్కాస్టింగ్ ఏర్పాటు చేయాలని నిర్ణయించారు.
పోలింగ్ శాతం పెంపునకు ఎన్నికల సంఘం వినూత్న కార్యక్రమాలకు శ్రీకారం చుట్టింది. మహిళా ఓటర్లలో చైతన్యం కల్పించడానికి వారికోసం ప్రత్యేక పోలింగ్ కేంద్రాలను అందుబాటులోకి తెస్తున్నది. ఈసారి ప్రతి నియోజకవర్గంలో మహిళల కోసం ఐదు ప్రత్యేక పోలింగ్ కేంద్రాలు నెలకొల్పాలని నిర్ణయించింది. ఈ క్రమంలో వరంగల్తూర్పు నియోజకవర్గంలో కొత్తవాడలో 14, మండిబజార్లో 38, గిర్మాజీపేటలో 137, ఉర్సులో 176, శంభునిపేటలో 210వ నంబర్ కేంద్రాలను ప్రత్యేక మహిళా పోలింగ్ కేంద్రాలుగా ఎంపిక చేశారు. దివ్యాంగుల కోసం కరీమాబాద్లోని 186వ నంబర్ పోలింగ్ కేంద్రాన్ని సెలెక్ట్ చేశారు. 33, 70, 99, 124, 150 పోలింగ్ స్టేషన్లను మోడల్ పోలింగ్ కేంద్రాలుగా గుర్తించారు. యువత కోసం సీకేఎం కళాశాలలోని 22వ నంబర్ కేంద్రాన్ని ప్రత్యేక పోలింగ్ స్టేషన్గా నిర్ణయించారు.
ఎన్నికల నిర్వహణ కోసం వరంగల్తూర్పు నియోజకవర్గంలోని పోలింగ్ కేంద్రాలను పదిహేడు సెక్టార్లుగా అధికారులు గుర్తించారు. ఒక్కో సెక్టార్ పరిధిలో 12 నుంచి 14 పోలింగ్ కేంద్రాలు ఉండేలా ప్లాన్ చేశారు. ప్రతి సెక్టార్కు ఒక గెజిటెడ్ అధికారిని సెక్టోరల్ ఆఫీసర్గా నియమించారు. ఇప్పటికే ఈ పదిహేడు మంది సెక్టోరల్ ఆఫీసర్లు తమ పరిధిలోని ప్రతి పోలింగ్ కేంద్రాన్ని విజిట్ చేసి నివేదిక రూపొందించారు. ఆయా పోలింగ్ కేంద్రంలో ర్యాంపు, తాగునీటి వసతి, పురుషులు, మహిళలకు వేర్వేరుగా టాయిలెట్స్, విద్యుదీకరణ వంటివి ఉన్నయా? లేవా? అనే అంశాలను నివేదికలో పొందుపరిచారు. ఎన్నికల సంఘం ఆదేశాల ప్రకారం వసతులు లేకపోతే చేపట్టాల్సిన ఏర్పాట్లపై ప్రతిపాదనలు చేశారు. సమస్యాత్మక, హింసాత్మక పోలింగ్ కేంద్రాలపైనా నివేదికలు అందజేశారు. ఆయా పోలింగ్ కేంద్రంలో గతంలో ఏమైనా ఘటనలు జరిగాయా, కేసులేమైనా నమోదయ్యాయా? బెదిరింపులు, దాడులు చోటుచేసుకున్నాయా? బ్యాలెట్ బాక్సులను ఎత్తుకెళ్లడం, ధ్వంసం చేయడంతో పాటు ఇతర నేరం జరిగిందా? అనే వివరాలను నివేదికల్లో పేర్కొన్నారు. ఈ నివేదికలను పరిశీలించిన ఎన్నికల అధికారులు పోలింగ్ కేంద్రాల్లో ఓటర్లకు అవసరమైన ఏర్పాట్లు చేపట్టడంతో పాటు పోలింగ్ ప్రశాంతంగా జరిగేందుకు ముందు జాగ్రత్తలు తీసుకుంటున్నారు.
ఎన్నికల ప్రవర్తన నియమావళి అమలు కోసం అధికారులు వరంగల్తూర్పు నియోజకవర్గంలో నాలుగు ఫ్లయింగ్ స్కాడ్లను ఏర్పాటు చేశారు. వివిధ ప్రభుత్వ శాఖల అధికారులను ఈ టీముల్లో నియమించారు. ప్రతి బృందానికి వెహికిల్ సమకూర్చి లొకేషన్ తెలుసుకోవడానికి ఆ వెహికిల్స్కు జియోట్యాగింగ్ చేశారు. ఈ నియోజకవర్గంలోని వరంగల్ మండలంలో రెండు, ఖిలావరంగల్ మండలంలో రెండు ఫ్లయింగ్ స్కాడ్లు పని చేస్తున్నాయి. షిప్టుల పద్ధతిలో అధికారులు, సిబ్బంది విధులు నిర్వర్తిస్తున్నారు. వీడియోగ్రఫీ కోసం ఈ నియోజకవర్గంలో రెండు వీడియో సర్వైలెన్స్ టీమ్లను ఏర్పాటు చేశారు. వీటితో పాటు ఒక వీడియో వీవింగ్ టీం, ఒక అకౌంటింగ్ బృందాన్ని కూడా ఎన్నికల అధికారులు నియమించారు. జిల్లా స్థాయిలో ఒక అసిస్టెంట్ ఎక్స్పెండిచర్ అబ్జర్వర్ ఉండగా, ఈ నియోజకవర్గంలో ఎన్నికల వ్యయ పరిశీలనకు ఇద్దరు అకౌంటెంట్లు బాధ్యతలు నిర్వర్తిస్తున్నారు.