కాజీపేట/ఖిలా వరంగల్/జనగామ చౌరస్తా , జనవరి 16 : ప్రయాణికులు త్వరగా గమ్యం చేరేందుకే కేంద్ర రైల్వేశాఖ వందేభారత్ రైలును ప్రవేశపెట్టిందని.. ఈ రైలు సేవలను ప్రజలు సద్వినియోగం చేసుకోవాలని వరంగల్ ఎంపీ పసునూరి దయాకర్ కోరారు. సికింద్రాబాద్ నుంచి విశాఖపట్నం వరకు ప్రవేశపెట్టిన ఈ రైలును ఆదివారం కాజీపేట రైల్వేజంక్షన్లో ఆయన జెండా ఊపి ప్రారంభించారు.
కాజీపేట జంక్షన్ మీదుగా తొలిసారి 180 కిలోమీటర్ల వేగంతో నడిచే కొత్త రైలు వస్తున్నదని తెలిసి తిలకించేందుకు వివిధ ప్రాంతాల నుంచి ప్రజలు పెద్దసంఖ్యలో తరలివచ్చి కరతాళ ధ్వనుల నడుమ పూలు చల్లి స్వాగతం పలికారు. ఫొటోలు దిగేందుకు ఉత్సాహం చూపారు. రైల్వే అధికారులు పట్టణ పరిధిలోని కేవీ పాఠశాలలకు చెందిన 132 మంది విద్యార్థులు, వారి తల్లిదండ్రులు కలిపి మొత్తం 200 మంది వరకు కాజీపేట రైల్వే జంక్షన్ నుంచి విజయవాడ వరకు వందేభారత్ రైలులో ప్రయాణించేందుకు వసతి కల్పించారు.
ఈ సందర్భంగా ఎంపీ దయాకర్ మాట్లాడుతూ అతివేగంగా నడిచే వందేభారత్ రైలును తెలంగాణలో ప్రవేశపెట్టాలని బీఆర్ఎస్ పార్టీ ఆధ్వర్యంలో కేంద్ర ప్రభుత్వం, ప్రధాని నరేంద్ర మోదీ, రైల్వేశాఖకు పలుమార్లు విజ్ఞప్తి చేశామని స్పందించి రైలు సౌకర్యం కల్పించినందుకు ప్రధానికి ప్రత్యేక కృతజ్ఞతలు తెలిపారు. అలాగే ప్రయాణికుల వినతుల దృష్ట్యా ఉత్తర, దక్షిణ ప్రాంతాలకు కీలకమైన కాజీపేట రైల్వే జంక్షన్లో వందేభారత్ రైలు స్టాప్ కోసం రైల్వేశాఖ, రైల్వే అధికారులపై ఒత్తిడి పెంచి ఆపేందుకు కృషి చేస్తానని హామీ ఇచ్చారు. రైల్వేపరంగా జిల్లా, కాజీపేట రైల్వే జంక్షన్ రావాల్సిన అన్నింటినీ సాధించేందుకు పాటుపడుతామన్నారు.
కార్యక్రమంలో రైల్వే సీనియర్ డీఈఈ ప్రశాంత క్రిష్ణసాయి, రైల్వే సీసీఐ రాజగోపాల్, స్టేషన్ మాస్టర్ బాలరాజు, ఆర్పీఎఫ్ ఏఎస్సీ శ్రీనివాస్, మాజీ మంత్రి గుండె విజయరామారావు, మాజీ మేయర్ రాజేశ్వర్రావు, మార్తినేని ధర్మారావు, డాక్టర్ విజయలక్ష్మి, కార్పొరేటర్లు, మాజీ కార్పొరేటర్లు బీజేపీ నాయకులు, స్థానిక ప్రజలు పాల్గొన్నారు. అలాగే వరంగల్ రైల్వేస్టేషన్లో వరంగల్ తూర్పు ఎమ్మెల్యే నన్నపునేని నరేందర్తో కలిసి ఎంపీ దయాకర్ జెండా ఊపి వందేభారత్ రైలును ప్రారంభించారు. ఈ సందర్భంగా రైల్వే అధికారులకు, పైలట్లకు, ప్రజలకు వారు శుభాకాంక్షలు తెలిపారు. అనంతరం ఎమ్మెల్యే మాట్లాడుతూ వందేభారత్ రైలును స్వాగతిస్తున్నామన్నారు. రెండు సార్లు మోదీ ప్రధాని అయినప్పటికీ తెలంగాణకు చేసిందేమీ లేదన్నారు. ప్రభుత్వరంగ సంస్థలపై ప్రైవేటీకరణపై పునరాలోచన చేయాలని సూచించారు.
రాష్ట్ర ప్రభుత్వం కాజీపేటలో భూములు కేటాయించినప్పటికీ రైల్వే కోచ్ ఫ్యాక్టరీని గుజరాత్కు తరలించుకుపోయారని, దేశ రాజధానిలో రైతులు ఏడాది పాటు నిరసనలు తెలిపినా పట్టించుకోలేదన్నారు. రూ.450 ఉన్న వంట గ్యాస్ రూ.1200లకు పెంచిన కేంద్రం నిత్యావసర ధరల పెరుగుదలకు అడ్డుకట్ట వేయలేకపోయిందన్నారు. బీఆర్ఎస్తోనే దేశం సుభిక్షంగా ఉంటుందని.. దేశ్కీ నేత కేసీఆర్ అంటూ నినదించారు. మోదీని గద్దె దించడం సీఎం కేసీఆర్ వల్లనే అవుతుందని ధీమా వ్యక్తం చేశారు. కార్యక్రమంలో రైల్వేస్టేషన్ నోడల్ ఆఫీసర్ సందీప్కుమార్, జెడ్ఆర్యూసీసీ సభ్యులు చింతాలకు సునీల్ పాల్గొన్నారు. అలాగే వందేభారత్ రైలుకు ఆదివారం జనగామలో రైల్వేస్టేషన్లో జిల్లా ప్రజలు, పుర ప్రముఖులు ఘన స్వాగతం పలికారు. పది నిమిషాల పాటు స్టేషన్లో ఆగడంతో ప్రజలు ఆనందంతో ఉప్పొంగిపోయారు. వందలాదిగా తరలివచ్చిన జనంతో రైల్వే స్టేషన్ ప్రాంగణం కిక్కిరిసిపోయింది.