వరంగల్, అక్టోబర్ 14(నమస్తే తెలంగాణ ప్రతినిధి) : వరంగల్ పశ్చిమ నియోజకవర్గ కాంగ్రెస్ పార్టీలో కొట్లాటలు కొనసాగుతూనే ఉన్నాయి. ఇటీవలి వరకు మాటకు మాట ఉండేది. ఇప్పుడు కొట్లాటలు, ఘర్షణలు, పరస్పరం కేసుల దశ నడుస్తున్నది. వరంగల్ పశ్చిమ నియోజకవర్గంలో రెండు వర్గాల లొల్లి మరోసారి బజారున పడింది. డీసీసీ అధ్యక్షుడు నాయిని రాజేందర్రెడ్డి, డీసీసీబీ మాజీ చైర్మన్ జంగా రాఘవరెడ్డి మధ్య టికెట్ల పోరు తీవ్రమైంది. పెద్దమ్మగడ్డ ప్రాంతంలో ఇటీవల రెండు వర్గాల నేతలు కొట్టుకున్నారు. పాదయాత్ర సందర్భంలో ఒకవర్గంపై మరో వర్గం దాడి చేయడం, ఆ తర్వాత రెండు వర్గాల వారు రోడ్డుపైనే కొట్టుకుని కేసులు పెట్టుకున్నారు. తాజాగా మరో వివాదం చెలరేగింది. జంగా రాఘవరెడ్డి పార్టీ మారుతున్నాడంటూ నాయిని రాజేందర్రెడ్డి అనుచరుడు తోట పవన్ సోషల్ మీడియాలో పోస్టు పెట్టాడనే విషయంలో ఇది మొదలైంది. దీనిపై జంగా సుబేదారి పోలీసు స్టేషన్లో ఫిర్యాదు చేశాడు.
తాను పార్టీ మారుతున్నానంటూ ఉద్దేశపూర్వకంగా తనను కించపరిచేలా పోస్టులు పెట్టిన తోట పవన్పై చట్ట ప్రకారం చర్యలు తీసుకోవాలని కోరారు. నాయిని ప్రోద్బలంతోనే ఇదంతా జరుగుతున్నదని రాఘవరెడ్డి వర్గం ఆరోపిస్తున్నది. టికెట్ విషయం కాంగ్రెస్ అధిష్టానం తేలుస్తుందని, ఇప్పుడు సోషల్ మీడియా పోస్టులు పెట్టడం వెనుక నాయిని కుట్ర ఉన్నదని అంటున్నది. రాఘవరెడ్డిపై నాయిని వర్గం తీవ్రమైన ఆరోపణలు చేస్తున్నది. రాఘవరెడ్డి ప్రతి ఎన్నికలకు ఒక అసెంబ్లీ సెగ్మెంట్లో పెత్తనం చేస్తూ, పార్టీకి నష్టం చేస్తున్నాడని నాయిని వర్గం అంటున్నది.
కాంగ్రెస్లోని రెండువర్గాల లొల్లి ఇప్పుడు ఆ పార్టీకి ఇబ్బందికరంగా మారింది. ఎన్నికల తరుణంలో సొంత పార్టీలోని నేతలే పరస్పరం కొట్టుకుని కేసులు పెట్టుకోవడంపై జనాలు నవ్వుకుంటున్నారు. వరంగల్ పశ్చిమ(హనుమకొండ) నియోజకవర్గం బీఆర్ఎస్కు కంచుకోటగా ఉన్నది. బీఆర్ఎస్(టీఆర్ఎస్) ఆవిర్భావం నుంచి ఇదే పార్టీ గెలుస్తున్నది. వరుసగా ఐదుసార్లు గులాబీ పార్టీ ఇక్కడ విజయం సాధించింది. 1998 ఉప ఎన్నిక తర్వాత కాంగ్రెస్ ఈ స్థానంలో ఎప్పుడూ గెలవలేదు. రెండున్నర దశాబ్దాలుగా ఇక్కడ ప్రాతినిథ్యం లేకుపోవడంతో కాంగ్రెస్కు ఈ సెగ్మెంట్లో బలం లేకుండాపోయింది. ఇప్పుడు గ్రూపుల రాజకీయం ఆ పార్టీ శ్రేణులను అయోమయానికి గురిచేస్తున్నది.
వరంగల్ పశ్చిమ నియోజకవర్గ కాంగ్రెస్లో రెండు వర్గాల మధ్య ఘర్షణ రెండేండ్లుగా కొనసాగుతున్నది. గత ఏడాది రాహుల్గాంధీ వరంగల్ పర్యటనకు వచ్చినప్పటి నుంచి ఇది పరాకాష్టకు చేరుకున్నది. రెండు వర్గాలు పరస్పరం కొట్టుకోవడం సాధారణ విషయంగా మారింది. నాయిని, జంగా మధ్య పోరు తీవ్రమవుతున్నది. పోటాపోటీగా కార్యక్రమాలు నిర్వహిస్తున్నారు. వీరిద్దరి మధ్య, వీరి వర్గాల మధ్య నిత్యం కొట్లాటలు జరుగుతున్నాయి. 2018 ఎన్నికల్లో పాలకుర్తి నియోజకవర్గంలో కాంగ్రెస్ అభ్యర్థిగా పోటీ చేసి ఓడిపోయిన జంగా ఆ తర్వాత తన రాజకీయ కేంద్రాన్ని వరంగల్ పశ్చిమ సెగ్మెంట్కు మార్చుకున్నారు. వచ్చే ఎన్నికల్లో ఇక్కడి నుంచే పోటీ చేస్తానని ప్రకటించారు.
నాయిని రాజేందర్రెడ్డికి పోటీగా జంగా హంటర్ రోడ్డు లో సొంత కార్యాలయాన్ని ప్రారంభించారు. వరంగల్ పశ్చిమ నియోజకవర్గ కాంగ్రెస్ కార్యాలయం అని దీనికి బోర్డు పెట్టారు. కాంగ్రెస్ జాతీయ, రాష్ట్ర స్థాయి అగ్రనేతలతో కలిపి జంగా ఫొటోతో దీనికి బోర్డును ఏర్పాటు చేశారు. జంగా ఆఫీసు ప్రారంభం వ్యవహారంపై నాయిని వర్గం డీసీసీ ఆఫీసు కేంద్రంగా పార్టీ కార్యక్రమాలు చేస్తున్నది. ఇద్దరూ వరంగల్ పశ్చిమ నియోజకవర్గం నుంచి పోటీ చేస్తామని ప్రకటనలు చేయడంతో రెండు వర్గాల మధ్య ఘర్షణలు మొదలయ్యాయి. ఇవి కొనసాగుతూనే ఉన్నాయి.