సింగరేణి యాజమాన్యం.. బొగ్గు ఉత్పిత్తి.., ఉత్పాదకత.., కార్మికుల సంక్షేమమంతోపాటు పర్యావరణ పరిరక్షక్షణకూ కృషిచేస్తున్నది. వాతావరణం, నదీ జలాలు కాలుష్యం కాకుండా వేస్ట్ ప్లాస్టిక్ను తిరిగి పార్కింగ్ టైల్స్, కంపోస్ట్ ఎరువుగా తయారు చేసేందుకు కొత్త విధానానికి శ్రీకారం చుట్టింది. అందులో భాగంగా శ్రీరాంపూర్ ఏరియాలో రూ.1.21 కోట్లతో మున్సిపల్ సాలిడ్ వేస్ట్ ట్రీట్మెంట్ ప్లాంట్ (ఎంఎస్డబ్ల్యూ) ఏర్పాటు చేసేందుకు నిర్ణయించింది. ఈ మేరకు సీఎండీ ఎన్ శ్రీధర్కు ప్రతిపాదనలు పంపగా, ఆమోదం లభించింది. రెండు నెలల్లో పూర్తికానుండగా, సంస్థకు నెలకు రూ.20 లక్షల ఆదాయం సమకూరనున్నది. హైదరాబాద్లో వినియోగంలో ఉన్న ఈ ప్లాంట్.. ఇక్కడ ఏర్పాటైతే సింగరేణిలోనే ప్రథమంగా నిలువనున్నది.
– శ్రీరాంపూర్, జూలై 22
సింగరేణి యాజమాన్యం పర్యావరణ పరిరక్షణకు, వాతావరణం, నదీ జలాలు కాలుషితం కాకుండా, ఖర్చుకు వెనుకాడకుండా శ్రీరాంపూర్ ఏరియాలో రూ.1.21 కోట్లతో మున్సిపల్ సాలిడ్ వేస్ట్ ట్రీట్మెంట్ ప్లాంట్(ఎంఎస్డబ్ల్యూ) ఏర్పాటు చేసేందుకు నిర్ణయించింది. ప్రభుత్వం స్వచ్ఛ భారత్లో భాగంగా దేశ వ్యాప్తంగా ఈ ప్లాంట్లను ఏర్పాటు చేసేందుకు ప్రోత్సహిస్తున్నది. ఈ మేరకు సీఎండీ శ్రీధర్కు ప్రతిపాదనలు పంపగా, ఆమోదం లభించింది. కాగా, శ్రీరాంపూర్ ఏరియా పాలిటెక్నిక్ కళాశాల సమీపంలో మరో రెండు నెలల్లో ప్లాంట్ ఏర్పాటు చేయనున్నారు. దీని ద్వారా సింగరేణి కార్మిక కాలనీలతో పాటు, మున్సిపాలిటీ నుంచి సేకరించే సాలిడ్ వేస్ట్ను వేరు చేసి, వివిధ రకాల ఉత్పత్తులుగా మార్చుతారు. తడి, పొడి చెత్తతో పాటు ప్లాస్టిక్ వస్తువులను యంత్రాల ద్వారా వేరుచేసి, విలువైన ఉత్పత్తులను, కంపోస్టు ఎరువులు తయారుచేసేందుకు ఉపయోగపడుతుంది. ఈ ప్లాంటు ఏర్పాటుకు సుమారు 4 ఎకరాల స్థలం అవసరమవుతుంది. దీని ఏర్పాటుతో కాలనీల్లో పరిశుభ్రత ఏర్పాటవుతుంది. సేకరించిన వేస్టేజీ ఉపయోగంలోకి వచ్చి వస్తువులుగా మారి వినియోగంలోకి వస్తుంది. దీంతో రోడ్లపై చెత్త కనిపించదు. అలాగే పర్యావరణ కాలుష్యం కాకుండా ఉండే అవకాశం ఉంది. డంప్ యార్డులో నిల్వలు తగ్గి, దుర్వాసన రాకుండా ఉంటుంది.
మార్కెట్ యార్డుల నుంచి వ్యర్థాలు, మురుగు కాలువల నుంచి, మున్సిపాలిటీ డంప్యార్డులు, కాలనీల్లో ఉపయోగించే ప్లాస్టిక్ బాటిళ్లు, ఇతర వస్తువలను సేకరించి, ప్లాంట్కు తరలిస్తారు. ఈ యంత్రం ద్వారా చెత్తను, ప్లాస్టిక్ను వేరు చేస్తారు. దాని ద్వారా వివిధ వస్తువులు తయారుచేస్తారు. ఏరియాలో 6,850 క్వార్టులు ఉన్నాయి. కాలనీల నుంచి రోజూ 18 నుంచి 20 టన్నుల మిక్స్డ్ సాలిడ్ వేస్టే వస్తుంది. ఇదంత సింగరేణి డంప్యార్డుకు తరలిస్తున్నారు. చెత్తాచెదారాన్ని, కాలనీల నుంచి వచ్చే వ్యర్థాలను సింగరేణి శానిటరీ సిబ్బంది సేకరిస్తున్నారు. సింగరేణితో పాటు నస్పూర్ మున్సిపాలిటీలో 150 మంది మున్సిపల్ సిబ్బంది నిత్యం సాలిడ్ వేస్ట్ సేకరించి, డంప్యార్డులో వేస్తున్నారు.
సింగరేణి యాజమాన్యం సీసీసీ నస్పూర్లో ఏర్పాటు చేయనున్న మున్సిపల్ సాలిడ్ వేస్ట్ ట్రీట్మెంట్ ప్లాంటును రూ.1.21 కోట్లతో ఏర్పాటు చేస్తున్నది. ఈ మేరకు సివిల్ పనులు జరుగుతున్నాయి. మరో రెండు నెలల్లో ఏర్పాటు చేసేందుకు పనులు జరుగుతున్నాయి. సింగరేణి యాజమాన్యం నిర్వహనలో ఈ ప్లాంట్ కొనసాగుతుంది. నస్పూర్, శ్రీరాంపూర్ ఏరియాల నుంచి రోజుకు 18 నుంచి 20 టన్నుల సాలిడ్ వేస్ట్, ప్లాస్టిక్ చెత్తా చెదారం, వస్తువులు సేకరించి యంత్రాల ద్వారా వేరు చేస్తారు. వివిధ ఉత్పత్తులు తయారు చేస్తారు. రోజుకు 3 టన్నుల కంపోస్ట్ తయారు చేస్తారు. దీని ద్వారా నెలకు రూ.4.5 లక్షలు సమకూరనున్నది. వివిధ ఉత్పత్తులు పేపర్ గ్లాసులు, ఆర్డీఎఫ్ ద్వారా రోజుకు 5 టన్నులతో నెలకు రూ.15 లక్షల రాబడి రానున్నది. అలాగే ప్లాస్టిక్ వస్తువుల ద్వారా తయారు చేసే పార్కింగ్ టైల్స్ రోజు టన్ను (800)టైల్స్తో నెలకు రూ.4.80 లక్షలు రానున్నాయి. మొత్తం నెలకు ప్లాంటు నిర్వాహణ ఖర్చు రూ.4 లక్షలు కానున్నది. ఆదాయం రూ.24 లక్షలు ఉండనున్నది. ఖర్చులు పోను నెలకు రూ.20 లక్షల ఆఇదాయం సంస్థకు సమకూరనున్నది.
పర్యావరణ రక్షణ, నదీ జలాలు కాలుష్యం కాకుండా ఉండేందుకు సింగరేణి యాజమాన్యం మొదటిసారిగా శ్రీరాంపూర్ ఏరియాలో మున్సిపల్ సాలిడ్ వెస్టేజీ ట్రీట్మెంట్ ప్లాంటు ఏర్పాటు చేస్తున్నది. సంస్థ ఆధ్వర్యంలోనే కొనసాగుతుంది. మున్సిపల్ వేస్టేజీతో వివిధ ఉత్పత్తులు తయారుచేయడం, రైతులకు ఉపయోగలా కంపోస్టు ఎరువు, పార్కింగ్ టైల్స్ తయారు చేసి ఇస్తాం. భూమిలో ప్లాస్టిక్ మట్టిగా మారడానికి 100 ఏండ్లు పడుతుంది. పొల్యూట్ అవుతుంది. దాని నివాణకే ఈ ప్లాంటు ఏర్పాటు చేస్తున్నాం.
సింగరేణి యాజమాన్యం చేపడుతున్న కార్మికుల సంక్షేమంలో భాగంగా, ప్రజాహితం కోసం ఎంఎస్డబ్ల్యూ ప్లాంటు ఏర్పాటు చేస్తున్నది. ప్లాంటు నిర్వాహణకు 10 మంది సిబ్బంది అవసరం పడుతుంది. తక్కువ పెట్టుబడితో శ్రీరాంపూర్, నస్పూర్ ప్రాంత కాలనీల నుంచి సేకరించే చెత్తాచెదారం, తడి, పొడిచెత్త, ప్లాస్టిక్ కవర్లు, బాటిళ్లు సేకరించి వివిధ వస్తువులు తయారు చేస్తారు. వేస్టేజీని ఉపయోగంలోకి తెచ్చి, వివిధ వస్తువల ద్వారా రీసైకిల్ చేయడం జరుగుతుంది. దీంతో సంస్థకు ఆదాయం సమకూరుతుంది.