ములుగు : వాతావరణశాఖ హెచ్చరికల మేరకు ములుగు (Mulugu) జిల్లాలో ఆరెంజ్ అలెర్ట్ (Orange alert ) జారీ అయినందున అవసరమైతే తప్ప ఎవరూ బయటకు రావొద్దని రాష్ట్ర పంచాయతీరాజ్ శాఖ మంత్రి డాక్టర్ దనసరి అనసూయ సీతక్క (Minister Sitakka) ప్రజలకు సూచించారు. ఆదివారం ఆమె ములుగు మండలం లోని జాకారం, గట్టమ్మ మధ్యలో జరుగుతున్న బ్రిడ్జి నిర్మాణ పనులను, వరద ఉధృతిని ఆమె పరిశీలించారు.
మంత్రి మాట్లాడుతూ గత 3 రోజులుగా ఎడతెరిపి లేకుండా కురుస్తున్న వర్షాలకు (Rains) ప్రజలు ఇబ్బందులు ఎదుర్కొంటున్నారని వెల్లడించారు. ప్రజలు అప్రమత్తంగా ఉండాలని సూచించారు. జాతీయ రహదారి (National Highway) పై నిర్మిస్తున్న బ్రిడ్జి నిర్మాణ పనులను త్వరితగతిన పూర్తి చేయాలని, ప్రజలకు రవాణా సౌకర్యాలకు ఇబ్బందులు తలెత్తకుండా చూడాలని అధికారులను ఆదేశించారు.
ముఖ్యంగా వర్షాలకు వాగులు వంకలు పొంగిపొర్లుతున్నాయని, ఎవరూ కూడా చేపల వేటకు వెళ్లవద్దన్నారు. లోతట్టు ప్రాంతాలలో ఉన్న ప్రజలను సురక్ష ప్రాంతాలకు తరలించి విధంగా ప్రభుత్వం అన్ని ఏర్పాట్లు చేసిందని పేర్కొన్నారు. జిల్లా అధికారులు ఎప్పటికప్పుడు ప్రజలకు అందుబాటులో ఉండాలని వెల్లడించారు.