కరీమాబాద్, అక్టోబర్ 3 : రాష్ట్రంలో అభివృద్ధి, సంక్షేమమే ధ్యేయం పాలన కొనసాగుతోందని, సీఎం కేసీఆర్ నాయకత్వమే తెలంగాణకు శ్రీరామరక్ష అని వర్ధన్నపేట ఎమ్మెల్యే అరూరి రమేశ్ అన్నారు. మంగళవారం తిమ్మాపూర్ గ్రామానికి చెందిన జిల్లా కాంగ్రెస్ పార్టీ యూత్ ప్రధాన కార్యదర్శి చెవ్వ శివరామకృష్ణ దాదాపు 500 మందితో ఎమ్మెల్యే అరూరి రమేశ్ ఆధ్వర్యంలో బీఆర్ఎస్లో చేరారు. ఈ సందర్భంగా ఎమ్మెల్యే మాట్లాడుతూ తెలంగాణ ప్రభుత్వం, ముఖ్యమంత్రి కేసీఆర్ అమలు చేస్తున్న సంక్షేమ పథకాలను చూసి యువత స్వచ్ఛందంగా బీఆర్ఎస్లోకి చేరుతోందన్నారు. ప్రజలందరూ బీఆర్ఎస్ వైపే ఉన్నారన్నారు. ఎవరెన్ని కుట్రలు చేసినా తెలంగాణలో టీఆర్ఎస్కు ఎదురులేదన్నారు.
అభివృద్ధ్ది, సంక్షేమంతో ముఖ్యమంత్రి కేసీఆర్ రాష్ర్టాన్ని దేశంలోనే అగ్రగామిగా నిలుపుతున్నారన్నారు. పార్టీని నమ్ముకుని వచ్చిన వారికి అండగా ఉంటామన్నారు. పార్టీ కోసం పని చేసే వారికి సముచిత స్థానం కల్పిస్తామన్నారు. పార్టీలోని కొత్త, పాత తేడా లేకుండా నాయకులు కలసికట్టుగా ముందుకు సాగాలన్నారు. బీఆర్ఎస్లోనే సామాన్యులకు సైతం అవకాశాలు వస్తాయన్నారు. పార్టీ బలోపేతానికి అందరం పని చేయాలన్నారు. బీజేపీ ప్రజావ్యతిరేక విధానాలను అవలంభిస్తోందన్నారు. కాంగ్రెస్, బీజేపీ నాయకుల కుటిల రాజకీయాలు ప్రజలకు తెలుసన్నారు. బీఆర్ఎస్ పార్టీ ప్రజల కోసం చేస్తున్న పనులను క్షేత్రస్థాయిలో వివరించాలన్నారు. ముఖ్యమంత్రి కేసీఆర్ నాయకత్వాన్ని ప్రజలు కోరుకుంటున్నారన్నారు సీఎం కేసీఆర్ సహకారం, మంత్రి కేటీఆర్ అండదండలతో నియోజకవర్గాన్ని అన్ని విధాలా అభివృద్ధి చేశానన్నారు. రానున్న రోజుల్లో మరిన్ని పనులు చేపడతానని తెలిపారు. కార్యక్రమంలో పీఏసీఎస్ చైర్మన్ వనం రెడ్డి, రైతు బంధుసమితి కోఆర్డినేటర్ కంకణాల సంపత్రెడ్డి, కార్పొరేటర్ అరుణ, బీఆర్ఎస్ నాయకులు పాల్గొన్నారు.
అభివృద్ధే ప్రధాన లక్ష్యం
కాశీబుగ్గ : నియోజకవర్గ పరిధిలోని డివిజన్ల అభివృద్ధే తమ ప్రధాన లక్ష్యమని ఎమ్మెల్యే అరూరి రమేశ్ అన్నారు. 3వ డివిజన్లోని ఆరెపల్లి, పైడిపల్లి, కొత్తపేటలో పలు అభివృద్ధి పనులకు మేయర్ గుండు సుధారాణితో కలిసి శంకుస్థాపన చేశారు. పైడిపల్లిలో డప్పు చప్పుళ్లతో కళాకారులు వారికి స్వాగతం పలికారు. అనంతరం ఎమ్మెల్యే మాట్లాడుతూ విలీన గ్రామాల అభివృద్ధికి అధిక మొత్తంలో ప్రత్యేకంగా నిధులు కేటాయించినట్లు తెలిపారు. 3వ డివిజన్ పరిధిలో రూ.6.90కోట్లతో సీసీ రోడ్డు, సైడ్ డ్రైన్ల నిర్మాణ పనులకు శంకుస్థాపన చేసినట్లు తెలిపారు. విలీన గ్రామాలను గత ప్రభుత్వం నిర్లక్ష్యం చేసిందన్నారు. బీఆర్ఎస్ ప్రభుత్వం అధిక నిధులు కేటాయించి, అభివృద్ధి చేస్తున్నట్లు తెలిపారు. కార్యక్రమంలో రైతు బంధు సమితి జిలా అధ్యక్షురాలు ఎల్లావుల లలితా కుమార్ యాదవ్, కార్పొరేటర్ జన్ను షీబారాణి అనిల్, వరంగల్ పీఏసీఎస్ చైర్మన్ ఇట్యాల హరికృష్ణ, మాజీ కార్పొరేటర్ వీర భిక్షపతి, 3వ డివిజన్ అధ్యక్షుడు నేరెళ్ల రాజు, నాయకులు జన్ను రాజయ్య, ఇట్యాల శిరీషా సతీశ్, పండుగ రవీందర్రెడ్డి, దయ్యాల వేణు, జన్ను సారంగపాణి(జేఎస్పీ), మంతుర్తి కుమార్యాదవ్ పాల్గొన్నారు.