తాడ్వాయి, జూలై 26 : సారలమ్మ దేవత ప్రధాన పూజారి కాక సంపత్(35) అనారోగ్యంతో శుక్రవారం మధ్యాహ్నం మృతిచెందారు. కొంతకాలంగా అనారోగ్యంతో బాధపడుతున్న సంపత్కు కుటుంబ సభ్యులు చికిత్స చేయిస్తున్నారు. ఈ క్రమంలో శుక్రవారం మధ్యాహ్నం ఆరోగ్య పరిస్థితి విషమించి ఇంటివద్దనే మృతిచెందాడు. అతడి తల్లి కాక అమృతమ్మ సారలమ్మ దేవత ప్రధాన పూజారిగా కొనసాగుతున్నారు. రెండేళ్లకోసారి జరిగే అమ్మవార్ల మహాజాతరలో భాగంగా తల్లిని గద్దెపైకి చేర్చే క్రమంలో పూజారులకు ఇబ్బంది తలెత్తకుండా సంపత్ సేవలను అందిస్తాడు.
జాతర ప్రారంభానికి 14 రోజుల ముందు నుంచే ఎంతో నిష్టతో సారలమ్మ దేవత ప్రధాన పూజల్లో పాల్గొంటాడు. గత జాతరలో ఎంతో ఉత్సాహంగా పనిచేసిన సంపత్ అకాలమృతితో పూజారుల కుటుంబాల్లో విషాదఛాయలు అలుముకున్నాయి. కాగా, ఒకే నెలలో సమ్మక్క పూజారి మల్లెల ముత్తయ్య, సారలమ్మ పూజారి కాక సంపత్ మృతిచెందడంతో వారి కుటుంబాలు, గ్రామాల్లో విషాదఛాయలు అలుకున్నాయి. ఈ నెల 20న ముత్తయ్య అనారోగ్యంతో చికిత్స పొందుతూ ఇంటివద్దనే మృతిచెందాడు. ఆ విషాదం నుంచి పూజారుల కుటుంబాలు తేరుకోకముందే 6 రోజుల వ్యవధిలోనే సారలమ్మ పూజారి కన్నెపల్లిలో అనారోగ్యంతో మృతి చెందాడు.