ఖిలావరంగల్, జూలై 14 : కోట అభివృద్ధికి భూమిని సేకరించి రైతులకు డబ్బులు ముట్టజెప్పి ఏళ్లు గడుస్తున్నా రికార్డుల్లో మాత్రం పేర్లు మార్చడం లేదు. ఫలితంగా ఈ భూములకు రైతుబంధు పడుతుండగా, మరి కొంతమంది పంటరుణాలు పొందారు. మరొకరైతే ఏకంగా అమ్మిన భూమినే ఫ్యామిలీ మెంబర్ సర్టిఫికెట్ చేయించి పట్టా మార్పిడి చేయించుకున్నారు. అధికారుల సమన్వయ లోపం, నిర్లక్ష్యం వల్ల ప్రభుత్వ ఖజానాకు గండిపడుతోంది.
రైతు భరోసా, ప్రభుత్వ భూముల పరిరక్షణ అంటూ గొప్ప గొప్ప మాటలు చెబుతున్న కాంగ్రెస్ ప్రభుత్వ తీరుపై సర్వత్రా విమర్శలు వెల్లువెత్తున్నాయి. ఖిలావరంగల్ మధ్యకోటలోని ఏకశిల చిల్డ్రన్స్ పార్క్ను కాకతీయ పట్టణాభివృద్ధి సంస్థ (కుడా) నిర్మించింది. పార్క్ పరిరక్షణతో పాటు గుండు చెరువు పరిసర ప్రాంతాల సుందరీకరణ, అభివృద్ధి కోసం భూసేకరణ చేపట్టాలని ప్రభుత్వాన్ని కోరింది. దీంతో గుండు చెరువు చుట్టూ, ఏకశిల పార్కు పరిసర ప్రాంతాల్లోని రైతుల భూములు 29.29 ఎకరాలు ప్రభుత్వం కొనుగోలు చేసి కుడాకు అప్పగించింది.
కుడా అధికారులు చుట్టూ ప్రహరీ నిర్మించి తమ ఆధీనంలోకి తీసుకున్నారు. అయితే 2018లో ఎకరానికి రూ.22 లక్షలు చెల్లించిన అధికారులు భూ రికార్డులు మార్చకుండా తాత్సారం చేస్తూ వచ్చారు. 2019 నుంచి భూములు అమ్మిన రైతుల ఖాతాలో రైతుబంధు జమవుతోంది. మరికొంత మంది రైతులు పట్టా పాస్ బుక్ను పెట్టి పంట రుణాలు కూడా తీసుకున్నారని ప్రచారం జరుగుతోంది. అలాగే మార్టిగేజ్ రుణాల కోసం ప్రయత్నాలు జరుగుతున్నట్లు తెలిసింది. అలాగే సర్వే నంబర్ 85లో 2.3 ఎకరాల భూమి ఇంకా దేనబోయిన సందయ్య పేరుపైనే రికార్డులో ఉంది. ఆయన ఇటీవల మృతిచెందగా, కుటుంబ సభ్యులు అతడి భార్య యాదమ్మ పేరుపై ఖిలావరంగల్ తహసీల్దార్ కార్యాలయంలో పట్టా చేయించుకున్నారు.
ప్రభుత్వం కొనుగోలు చేసిన సంబంధిత భూమి సర్వే నంబర్లలో అధికారులు పేర్లు మార్పిడి చేయకుండా చోద్యం చూస్తున్నారనే ప్రచారం జరుగుతోంది. ప్రభుత్వానికి అమ్మిన భూమిని మరొకరి పేరుతో రిజిస్ట్రేషన్ చేయించుకున్న వ్యక్తులపై ఇప్పటి వరకు చర్యలు తీసుకోకపోవడంపై పలు అనుమానాలకు దారితీస్తోంది. అధికారుల అండదండలతోనే రిజిస్ట్రేషన్ పూర్తయిందనే ఆరోపణలు కూడా ఉన్నాయి.
రైతుల పేర్లపై ఉన్న భూరికార్డులను మార్చాలని రెవెన్యూ అధికారులకు లిఖిత పూర్వకంగా ఇచ్చామని కుడా అధికారులు అం టుండగా, తమకు సంబంధం లేదని, కుడా అధికారుల నిర్ల క్ష్యం వల్లే రికార్డుల్లో పేరు మారలేదని రెవెన్యూ శాఖ అధికారులు పరస్పరం ఒకరిపై ఒకరు ఆరోపణలు చేసుకుంటున్నా రు. స్లాట్ బుక్ అయింది కాబట్టే రిజిస్ట్రేషన్ చేశామని రెవెన్యూ అధికారులు పేర్కొంటున్నారు. ఇప్పటికైనా జిల్లా ఉన్నతాధికారులు స్పందించి భూ రికార్డులలో పేర్లు మార్చాలని, ఇతరుల పేర్లపై రిజిస్ట్రేషన్ చేయించుకున్న వ్యక్తులపై చర్యలు తీసుకోవాలని స్థానికులు కోరుతున్నారు.