దేవరుప్పుల, ఫిబ్రవరి 12: కృష్ణా జలాలను కేంద్రానికి తాకట్టు పెట్టిన కాంగ్రెస్ ప్రభుత్వం తెలంగాణ రైతాంగానికి తీరని అన్యాయం చేసిందని మాజీ మంత్రి ఎర్రబెల్లి దయాకర్రావు విమర్శించారు. సోమవారం జనగామ జిల్లా దేవరుప్పుల మండలం సీతారాంపురంలో ఆయన విలేకరులతో మాట్లాడారు. తెలంగాణ ఉద్యమం పుట్టిందే వలస పాలకుల నీటి దోపిడీకి వ్యతిరేకంగా అన్నారు. ఉద్యమ నేత కేసీఆర్ పోరాట ఫలితంగా స్వరాష్ట్రం ఏర్పడిందన్నారు. గత పదేళ్లుగా వ్యవసాయానికి సాగునీరు, ప్రజలకు తాగునీరు అందించిన ఘనత బీఆర్ఎస్ ప్రభుత్వానిదేనన్నారు. కృష్ణా జలాలపై కేంద్ర ప్రభుత్వం పెత్తనం చేయాలని యత్నిస్తే అడ్డుకట్ట వేసిన చరిత్ర బీఆర్ఎస్ ప్రభుత్వానికి ఉందన్నారు. కాంగ్రెస్ ప్రభుత్వం వచ్చీరాగానే నాగార్జునసాగర్ జలాలను కేఆర్ఎంబీకి అప్పజెప్పడం బాధ్యతారాహిత్యమన్నారు. దీంతో ఐదు ఉమ్మడి జిల్లాలు ఎడారిగా మారే పరిస్థితి నెలకొందన్నారు. ఈ నేపథ్యంలో కృష్ణా జలాలపై మంగళవారం నల్లగొండలో బీఆర్ఎస్ బహిరంగ సభ ఏర్పాటు చేసిందన్నారు. దీనికి భయపడిన కాంగ్రెస్ ప్రభుత్వం తాము నాగార్జునసాగర్ డ్యామ్ నిర్వహణను కేంద్రానికి అప్పగించలేదని తప్పుడు ప్రచారం చేస్తున్నారని ఎర్రబెల్లి అన్నారు. అమలు కానీ హామీలతో ప్రజలను మభ్యపెట్టి అధికారంలోకి వచ్చిన కాంగ్రెస్ పార్టీ నిజస్వరూపాన్ని ప్రజలు నెల రోజుల్లోనే తెలుసుకున్నారని వివరించారు. ఐదు గ్యారెంటీలు అమలు కావనే విషయం ప్రజలకు అర్థమైందన్నారు.
రైతుబంధు పథకం డబ్బులు నేటికీ రైతుందరికీ అందలేదని, దీంతో అనేక మంది ప్రైవేట్ వడ్డీ వ్యాపారాలను ఆశ్రయిస్తున్నారని మాజీ మంత్రి ఎర్రబెల్లి అన్నారు. ఈ నేపథ్యంలో కాంగ్రెస్ ప్రభుత్వ వైఫల్యాలపై నల్లగొండ సభలో వివరించనున్నట్లు ఆయన తెలిపారు. ఈ సభకు పాలకుర్తి నియోజకవర్గ ప్రజలు వేలాదిగా తరలివాలని ఆయన పిలుపునిచ్చారు.ఈ కార్యక్రమంలో ఎంపీపీ బస్వ సావిత్రి, బీఆర్ఎస్ మండల నాయకులు పల్లా సుందరరాంరెడ్డి, బస్వ మల్లేశ్, వైస్ ఎంపీపీ, మాజీ ఎంపీపీ కొల్లూరు సోమయ్య, బీఆర్ఎస్ మండల ప్రధాన కార్యదర్శి చింత రవి, సీతారాంపురం గ్రామ అధ్యక్షుడు బస్వ వెంకన్న, చౌడూరు మాజీ ఉపసర్పంచ్ మేకల యాదగిరి, నాయకులు ఆలకుంట్ల యాదగిరి, హనుమంతు, వీరస్వామి, కారుపోతుల యాదగిరి, యాకూబ్ పాషా, ఆవుల వీరన్న, ఉమేశ్, కుమార్, వరికెల శివాజీ తదితరులు పాల్గొన్నారు