వరంగల్, మార్చి 22(నమస్తే తెలంగాణ)/తొర్రూరు : వడగండ్ల బాధితులకు భరోసానిచ్చేందుకు రైతు బాంధవుడు వస్తున్నాడు. ఆరుగాలం కష్టించి వేసిన పంట చేతికొచ్చే సమయంలో నీటిపాలై ఆగమైన రైతన్నకు కొండంత ధైర్యం ఇచ్చేందుకు ముఖ్యమంత్రి కేసీఆర్ గురువారం వరంగల్, మహబూబాబాద్ జిల్లాలో పర్యటించనున్నారు. తీవ్రం నష్టం వాటిల్లిన పెద్దవంగర మండలం రెడ్డికుంట తండాతో పాటు దుగ్గొండి మండలం అడవి రంగాపురంలో దెబ్బతిన్న పంటలను క్షేత్రస్థాయిలో పరిశీలించనున్నారు. ఈమేరకు ఆయా చోట్ల అధికారులు హెలిప్యాడ్ను సిద్ధం చేయగా మంత్రి ఎర్రబెల్లి దయాకర్రావు, ఎమ్మెల్యేలు పెద్ది సుదర్శన్రెడ్డి, చల్లా ధర్మారెడ్డి ఏర్పాట్లను పరిశీలించారు. అకాల వర్షంతో వరంగల్ జిల్లాలో 69వేల ఎకరాల్లో, మానుకోటలో 21 వేల ఎకరాల్లో వివిధ పంటలు నష్టపోయినట్లు జిల్లా అధికారులు ప్రాథమికంగా అంచనా వేశారు.
ఈ నెల 18, 19 తేదీల్లో కురిసిన వడగండ్ల వానతో ఉమ్మడి జిల్లాలో పంటలకు తీవ్ర నష్టం వాటిల్లగా, తీవ్రంగా దెబ్బతిన్న ప్రాంతాల్లో గురువారం ముఖ్యమంత్రి కేసీఆర్ పర్యటించనున్నారు. ముఖ్యంగా వరంగల్, మహబూబాబాద్ జిల్లాల్లో క్షేత్రస్థాయిలో పర్యటించి రైతులకు భరోసా ఇవ్వనున్నారు. ఈమేరకు అధికార యంత్రాంగం అన్ని ఏర్పాట్లు చేసింది. గురువారం మధ్యాహ్నం 12:10గంటలకు ఖమ్మం నుంచి హెలికాప్టర్లో పెద్దవంగర మండలం రెడ్డికుంటతండాకు సీఎం కేసీఆర్ చేరుకుంటారని రాష్ట్ర పంచాయతీరాజ్శాఖ మంత్రి ఎర్రబెల్లి దయాకర్రావు తెలిపారు. అలాగే పోచారం, వడ్డేకొత్తపల్లి, బొమ్మకల్లో వడగళ్లతో దెబ్బతిన్న పంటలను పరిశీలించి రైతులతో మాట్లాడుతారని చెప్పారు.
అనంతరం అక్కడినుంచి హెలికాప్టర్లో వరంగల్ జిల్లా దుగ్గొండి మండలంలోని అడవిరంగాపూర్కు 12:55గంటలకు చేరుకొని బాధిత రైతులను ఓదార్చుతారని మంత్రి తెలిపారు. పంటల క్షేత్రస్థాయిలో సందర్శనలో ముఖ్యమంత్రి వెంట ఉమ్మడి జిల్లా ఎంపీలు, ఎమ్మెల్సీలు, ఎమ్మెల్యేలు, కార్పొరేషన్ చైర్మన్లు, జిల్లా పరిషత్ అధ్యక్షులు ఉంటారని ఎర్రబెల్లి వివరించారు. ఈమేరకు రెడ్డికుంట తండాలో హెలిప్యాడ్ స్థలాన్ని, ముఖ్యమంత్రి పర్యటించే ప్రాంతాలను మహబూబాబాద్ జిల్లా కలెక్టర్ శశాంక, ఎస్పీ శరత్చంద్ర పవార్, అడిషనల్ కలెక్టర్ డేవిడ్, అడిషనల్ ఎస్పీ చెన్నయ్య, ఆర్డీవో రమేశ్తో పాటు వివిధ శాఖల అధికారులు రెడ్డికుంట తండాలో ఏర్పాట్లను పర్యవేక్షిస్తున్నారు. వీరి వెంట పెద్దవంగర ఎంపీపీ ఈదురు రాజేశ్వరీ ఐలయ్య, జడ్పీటీసీ శ్రీరాంజ్యోతిర్మయి సుధీర్, బీఆర్ఎస్ నాయకుడు జాటోత్ నెహ్రూనాయక్, కే.సోమనర్సింహారెడ్డి, ఎంపీటీసీ రవీందర్, పీఏసీఎస్ చైర్మన్ కాకిరాల హరిప్రసాద్, తొర్రూరు జడ్పీటీసీ మంగళపల్లి శ్రీనివాస్, పాలకుర్తి దేవస్థానం చైర్మన్ వీ.రామచంద్రయ్య ఉన్నారు.
వరంగల్లో 69వేల ఎకరాల్లో నష్టం
వరంగల్ జిల్లాలో 69వేల ఎకరాల్లో పంటలు దెబ్బతిన్నట్లు అధికారులు ప్రాథమికంగా అంచనా వేశారు. ఈమేరకు దెబ్బతిన్న పంటలను పరిశీలించేందుకు సీఎం కేసీఆర్ రానుండగా దుగ్గొండి మండలం అడవిరంగాపురం గ్రామం వద్ద హెలీప్యాడ్ సిద్ధంచేశారు. బుధవారం నర్సంపేట, పరకాల ఎమ్మెల్యేలు పెద్ది సుదర్శన్రెడ్డి, చల్లా ధర్మారెడ్డి అధికారులతో కలిసి ఏర్పాట్లను పరిశీలించారు. ఇప్పటికే మంత్రి ఎర్రబెల్లి దయాకర్రావు, ఎమ్మెల్యే పెద్దితో కలిసి మంగళవారం అడవిరంగాపురం గ్రామాన్ని సందర్శించి సీఎం కేసీఆర్ పర్యటన ఏర్పాట్లపై అధికారులకు సూచనలు చేశారు. అక్కడ దెబ్బతిన్న పంటలను పరిశీలించి తర్వాత సీఎం కేసీఆర్ రోడ్డు మార్గంలో పొరుగున ఉన్న సంగెం మండలంలోని వంజరపల్లి, పల్లార్గూడ తదితర గ్రామాల్లో దెబ్బతిన్న పంటలను క్షేత్రస్థాయిలో పరిశీలించే అవకాశం ఉన్నది. అలాగే గీసుగొండ మండలంలోని మచ్చాపూర్, గంగదేవిపల్లి మీదుగా కాకతీయ మెగా టెక్స్టైల్ పార్కుకు చేరుకుని ఇక్కడినుంచి హెలిక్యాప్టర్ ద్వారా వెళ్లనున్నారు.
ఈమేరకు ఎమ్మెల్యే చల్లా మెగా టెక్స్టైల్ పార్కును సందర్శించి హెలీప్యాడ్ను పరిశీలించారు. వరంగల్ పోలీస్ కమిషనర్ ఏవీ రంగనాథ్ అడవిరంగాపురం గ్రామంతో పాటు సీఎం కేసీఆర్ పర్యటించే గ్రామాలను సందర్శించి ఏర్పాట్లను పరిశీలించి అధికారులకు సూచనలు చేశారు. కాగా వడగండ్లతో జిల్లాలోని 249 గ్రామాల్లో పంటలకు నష్టం జరిగినట్లు అధికారులు గుర్తించారు. ప్రధాన పంటలైన మక్కజొన్న, వరి పంటకు భారీ నష్టం జరిగింది. దాదాపు 54వేల ఎకరాల్లో మక్కజొన్న, 12వేల ఎకరాల్లో వరికి నష్టం కలిగినట్లు ప్రభుత్వానికి పంపిన ప్రాథమిక నివేదికలో పేర్కొన్నారు. దెబ్బతిన్న పంటల్లో కొన్ని ఎకరాల్లో పత్తి, వేరుశనగ వంటివి కూడా ఉన్నట్లు పేర్కొన్నారు. మరో మూడు వేల ఎకరాలకు పైగా ఎకరాల్లో ఉద్యాన పంటలు దెబ్బతిన్నాయి. ఇందులో 2వేల ఎకరాల్లో కూరగాయలు, 200 ఎకరాల్లో మిరపతో పాటు అరటి, మామిడి, వాటర్మిలన్, డ్రాగన్ ఫ్రూట్ తదితర పండ్ల తోటలు ఉన్నట్లు తెలిపారు.
ఆది, సోమవారం నర్సంపేట, వర్దన్నపేట, పరకాల, వరంగల్ ఈస్ట్ ఎమ్మెల్యేలు పెద్ది సుదర్శన్రెడ్డి, అరూరి రమేశ్, చల్లా ధర్మారెడ్డి, నన్నపునేని నరేందర్ తమ నియోజకవర్గంలో పర్యటించి పలు గ్రామాల్లో అకాల వర్షంతో జరిగిన పంట నష్టాలను క్షేత్రస్థాయిలో పరిశీలించారు. ప్రభుత్వం అండగా ఉంటుందని బాధిత రైతులకు భరోసా ఇచ్చారు. పంట నష్టంపై వారం రోజుల్లోపే సర్వే నిర్వహించాలని ప్రభుత్వం ఆదేశించిన నేపథ్యంలో జిల్లా అధికారులు గ్రామం వారీగా సర్వేకు ప్రణాళిక రూపొందించారు. మండల వ్యవసాయ అధికారి, వ్యవసాయ విస్తరణ అధికారి, ఉద్యానశాఖ అధికారి సహ తహసీల్దార్, రెవెన్యూ ఉద్యోగులు ఈ బృందాల్లో ఉన్నారు. కొన్ని గ్రామాల్లో ఈ బృందంలో అధికారులు బుధవారం సర్వే నిర్వహించారు. గ్రామం వారీగా దెబ్బతిన్న పంటలను క్షేత్రస్థాయిలో పరిశీలించి నష్టాలను నమోదు చేశారు. గురువారం నుంచి పూర్తిస్థాయిలో బృందాలన్నీ పంట నష్టాలపై సర్వే జరుపనున్నట్లు అధికారులు వెల్లడించారు. వారంలోగా పంట నష్టాలపై సర్వే పూర్తిచేయాలనే పనిలో ఉన్నట్లు వారు తెలిపారు.
తొర్రూరు, పెద్దవంగర మండలాల్లో తీవ్ర నష్టం
అకాల వర్షంతో మహబూబాబాద్ జిల్లాలో 21వేల ఎకరాల్లో పంట జరుగగా, తొర్రూరు, పెద్దవంగర మండలాల్లో తీవ్రంగా పంటలు దెబ్బతిన్నాయి. కాగా, మూడు రోజులుగా మంత్రి దయాకర్రావు ఆయా ప్రాంతాల్లో క్షేత్రస్థాయిలో పర్యటిస్తున్నారు. అలాగే కలెక్టర్ శశాంక, వ్యవసాయ, ఉద్యాన శాఖల జిల్లా అధికారులు ఛత్రూనాయక్, సూర్యనారాయణ, సిబ్బంది సందర్శించి పంట నష్టంపై ప్రాథమిక నివేదిక సిద్ధం చేశారు. జిల్లాలో మొత్తం 21,408 ఎకరాల్లో పంటలు దెబ్బతినగా 9,138 మంది రైతులు సుమారు రూ.10 కోట్ల మేర నష్టపోయారని ప్రాథమిక నిర్ధారణకు వచ్చారు. ఇందులో అత్యధికంగా మకజొన్న11,531, వరి 4,958, మిర్చి 800 ఎకరాల్లో దెబ్బతినగా 3,705 ఎకరాల మామిడి తోటల్లో కాయలు నేలరాలినట్లు గుర్తించారు. జిల్లావ్యాప్తంగా అత్యధికంగా తొర్రూరు, పెద్దవంగర మండలాల్లో పంట నష్టం వాటిలినట్లు అధికారులు గుర్తించారు. పెద్దవంగర మండలంలోని 19 గ్రామాల్లో 2740 ఎకరాల్లో వివిధ పంటలు దెబ్బతినగా, తొర్రూరు మండలంలో 5,843 ఎకరాల్లో పంటల నష్టం జరిగింది.
పెద్దవంగర మండలంలో 18వ తేదీ రాత్రి నుంచి 19వ తేదీ తెల్లవారుతెల్లవారుజాము వరకు సుమారు 10 గంటల్లోనే 23.3 సెంటీమీటర్ల వర్షపాతం నమోదైంది. ఈ మండలంలో 300 ఎకరాల్లో మకజొన్న, 1550 ఎకరాల్లో వరి, 720 ఎకరాల్లో మామిడి తోటలు, 105 ఎకరాల్లో మిర్చి దెబ్బతినగా సుమారు 1055 మంది రైతులు సుమారు రూ.కోటీ యాభై లక్షల మేర పంట నష్టాన్ని చవిచూసినట్లు అధికారులు ప్రాథమిక అంచనాకు వచ్చారు. ఈ మండలంలో కోరిపల్లి, గంట్లకుంట, వడ్డేకొత్తపల్లి, పోచారం, పెద్దవంగర, ఆర్సీతండా, బొమ్మకల్లు రెడ్డికుంటతండాకు చెందిన రైతులే తీవ్ర నష్టాన్ని చవిచూశారు. ఇక తొర్రూరు మండలంలో కూడా జిల్లాలోనే అత్యధికంగా 1500 ఎకరాల్లో మకజొన్న, 2500 ఎకరాల్లో వరి, 1530 ఎకరాల్లో మామిడి తోటలు, 290 ఎకరాల్లో మిర్చి పంట దెబ్బతినగా, వివిధ ఇతర పంటలు కలిపి 5,843 ఎకరాల్లో పంట నష్టం వాటిల్లాయి. సుమారు 2వేల మంది రైతులు రూ. రెండున్నర కోట్లకు పైగా పంట నష్టపోయినట్లు అంచనా వేస్తున్నారు.