ఇనుగుర్తి , జూలై 22 : ఇనుగుర్తి ప్రభుత్వ పాఠశాలలోని మరుగుదొడ్ల కాంప్లెక్స్ను వెంటనే ప్రారంభించాలని ఎమ్మెల్యే మురళీనాయక్ అధికారులను ఆదేశించారు. అపరిశుభ్రంగా ఉన్న టాయిలెట్స్ వల్ల విద్యార్థులు పడుతున్న ఇబ్బంది విషయమై ఈ నెల 10న నమస్తే తెలంగాణలో ‘కంపు కొడుతున్నా వెళ్లాల్సిందే’! శీర్షికన ప్రచురితమైన కథనానికి ఆయన స్పందించి సోమవారం పాఠశాలలోని టాయిలెట్స్ని పరిశీలించారు.
గత బీఆర్ఎస్ ప్రభుత్వం మన ఊరు-మన బడిలో భాగంగా రూ.7.50లక్షలతో నిర్మించిన మరుగుదొడ్ల కాంప్లెక్స్ని పరిశీలించి వెంటనే వినియోగం తీసుకురావాలని సూచించారు. అలాగే మధ్యాహ్న భోజనాన్ని పరిశీలించారు. తరగతి గదుల్లో పైకప్పు ఊడుతున్నదని ఉపాధ్యాయులు తెలుపడంతో మరమ్మతులు చేపట్టాలని సంబంధిత శాఖ అధికారులకు చెప్పారు. అసంపూర్తిగా ఉన్న నాలుగు తరగతి గదుల పనులను వెంటనే ఉపయోగంలోకి తీసుకరావాలన్నారు. ప్రధానోపాధ్యాయురాలు రూపారాణి, కాంగ్రెస్ మండల అధ్యక్షుడు కురెల్లి సతీశ్, గంజి రాజేందర్రెడ్డి, బైరు అశోక్గౌడ్, తమ్మడపల్లి కుమార్, సతీశ్, చరణ్, మామిడి జనార్దన్ తదితరులు ఉన్నారు.