కాళేశ్వరం, జూలై 26 : గోదావరి నది మళ్లీ ఉప్పొంగి ప్రవహిస్తున్నది. కాళేశ్వరం వద్ద ఉగ్రరూపం దాల్చి మొదటి ప్రమాద హెచ్చరికకు చేరువలో ప్రవహిస్తున్నది. తెలంగాణ, మహారాష్ట్రలో కురుస్తున్న భారీ వర్షాలకు కాళేశ్వరం వద్ద ప్రాణహిత నది 9,54,300 క్యూసెక్కులుగా 12.53 మీటర్ల ఎత్తును దాటి ప్రవహిస్తూ లక్ష్మీబరాజ్ వైపు పరుగులు తీస్తున్నది.
పుష్కరఘాట్ పూర్తిగా మునిగిపోవడంతో భక్తులను స్నానాలకు అనుమతించడం లేదు. గంటగంటకూ గోదావరి పెరుగుతుండడంతో అధికారులు అక్కడే ఉండి గస్తీ కాస్తున్నారు. ఇక అన్నారం బరాజ్కు మానేరు, చిన్న, చిన్న కాల్వల ద్వారా 13,600 క్యూసెక్కుల నీరు వస్తున్నట్లు అధికారులు తెలిపారు. వచ్చిన నీటిని మొత్తం 66 గేట్లు ఎత్తి దిగువకు వదులుతున్నారు.