హనుమకొండ, మే 3 : వరంగల్-ఖమ్మం-నల్లగొండ పట్టభద్రుల నియోజకవర్గం బీఆర్ఎస్ పార్టీ ఎమ్మెల్సీ అభ్యర్థిగా ఏనుగుల రాకేశ్రెడ్డికి అవకాశం దక్కింది. ఈమేరకు శుక్రవారం సాయంత్రం బీఆర్ఎస్ అధినేత కేసీఆర్ ప్రకటించారు. ఇక్కడ ఎమ్మెల్సీగా ప్రాతినిధ్యం వహించిన పల్లా రాజేశ్వర్రెడ్డి జనగామ ఎమ్మెల్యేగా ఎన్నిక కావడంతో ఉప ఎన్నిక అనివార్యమైంది. ఇందుకుగాను కేంద్ర ఎన్నికల సంఘం ఇప్పటికే షెడ్యూల్ విడుదల చేసింది. నల్లగొండ కలెక్టర్ ఈ నెల 2న ఎన్నికల నోటిఫికేషన్ విడుదల చేయగా అదే రోజు నుంచి 9వ తేదీ వరకు నామినేషన్లు స్వీకరించనున్నారు. 10న నామినేషన్ల పరిశీలన, 13వరకు నామినేషన్ల ఉపసంహరణకు తుది గడువు విధించారు. ఈ నెల 27వ తేదీ ఉదయం 8 నుంచి సాయంత్రం 4గంటల వరకు పోలింగ్ జరుగనున్నది. జూన్ 5న ఓట్లు లెక్కిస్తారు. అధికారులు వెల్లడించిన తుది ఓటర్ల జాబితా ప్రకారం పట్టభద్రుల నియోజకవర్గంలో మొత్తం 4,61,806 మంది ఓటర్లు ఉండగా వీరిలో మహిళా ఓటర్లు 1,74,794, పురుషులు 2,87,007 మంది, ట్రాన్స్జెండర్లు ఐదుగురు ఉన్నారు. కాగా ఉమ్మడి వరంగల్ జిల్లాలో 1,67,853 మంది ఓటర్లు ఉన్నారు.
రాకేశ్రెడ్డిది సామాన్య రైతు కుటుంబం. ఆయన స్వగ్రామం హనుమకొండ జిల్లా హసన్పర్తి మండలంలోని వంగపహాడ్. రాకేశ్రెడ్డి బిట్స్ పిలానీలో మాస్టర్ మేనేజ్మెంట్ స్టడీస్(ఎంఎంఎస్), మాస్టర్ ఇన్ ఫైనాన్స్(ఎంఎస్) పూర్తి చేశారు. సిటీ బ్యాంక్ మేనేజర్గా, జేపీ మోర్గాన్, ఫేస్బుక్ లాంటి పలు అంతర్జాతీయ కార్పొరేట్ కంపెనీల్లో బెంగళూరు, అమెరికాల్లో ఏడేళ్ల పాటు ఉద్యోగాలు చేసి రాజకీయాలపై ఆసక్తితో వచ్చారు. 2013లో భారతీయ జనతా పార్టీ ద్వారా ప్రత్యక్ష రాజకీయాల్లోకి అడుగుపెట్టి అంచెలంచెలుగా ఎదుగుతూ బీజేపీలో బీజేవైఎం రాష్ట్ర కార్యదర్శి, రాష్ట్ర అధికార ప్రతినిధిగా పనిచేశారు. వరంగల్ కేంద్రంగా అనేక ఆధ్యాత్మిక, సామాజిక, సేవా కార్యక్రమాలు చేశారు. అసెంబ్లీ ఎన్నికల ముందు రాకేశ్రెడ్డి బీజేపీ నుంచి బీఆర్ఎస్లో చేరారు. ఈమేరకు పట్టభద్రుల ఎమ్మెల్సీ అభ్యర్థిగా రాకేశ్రెడ్డి పేరును బీఆర్ఎస్ ఖరారు చేసింది. అధిష్ఠానం నిర్ణయించిన తేదీన నామినేషన్ వేస్తానని రాకేశ్రెడ్డి తెలిపారు.