హనుమకొండ చౌరస్తా, జూలై 18 : ఉపాధ్యాయుల భర్తీ కోసం నిర్వహించే డీఎస్సీ-2024 పరీక్షలు గురువారం ప్రశాంతంగా ప్రారంభమయ్యాయి. హనుమకొండ నగరంలోని ఐదు పరీక్షా కేంద్రాల్లో ఉదయం 9 నుంచి 11.30 గంటల వరకు నిర్వహించిన పరీక్షకు 1,206 మందికి 1,038 మంది అభ్యర్థులు హాజరు కాగా, 168 మంది గైర్హాజరయ్యారు. రెండో విడత మధ్యాహ్నం 2 నుంచి 4.30 గంటల వరకు జరిగిన హసన్పర్తి ఎర్రగట్టు గుట్ట సమీపంలోని అయాన్ డిజిటల్ జోన్ పరీక్ష కేంద్రంలో నిర్వహించిన పరీక్షకు 138 మందికి 123 మంది అభ్యర్థులు హాజరయ్యారు. 15 మంది గైర్హాజరైనట్లు అధికారులు తెలిపారు. పరీక్ష కేంద్రాలను జిల్లా విద్యాశాఖాధికారి, డీఎస్సీ పరీక్షల పర్యవేక్షణాధికారి డీ వాసంతి సందర్శించారు. ఎక్కడా ఎలాంటి ఇబ్బందులు లేకుండా పరీక్షలు ప్రశాంతంగా జరిగినట్లు తెలిపారు. కాగా, పరీక్షా కేంద్రాల వద్ద పోలీసు బందోబస్తు ఏర్పాటు చేశారు.