నమస్తే నెట్వర్క్, జూలై 24: పార్లమెంటులో మంగళవారం కేంద్ర ఆర్థిక శాఖ మంత్రి ప్రవేశపెట్టిన బడ్జెట్లో తెలంగాణ రాష్ట్రానికి తీవ్రమైన అన్యాయం జరిగిందని ఆరోపిస్తూ ఖానాపురం మండలం ధర్మరావుపేటలో బీఆర్ఎస్ గ్రామ అధ్యక్షుడు మేకల కుమారస్వామి ఆధ్వర్యంలో నల్లబ్యాడ్జీలు ధరించి నిరసన తెలిపారు. ఈ సందర్భంగా ఆయన మాట్లాడుతూ జాతీయ పార్టీలకు ఓట్లేసి గెలిపిస్తే రాష్ర్టానికి తీరని అన్యాయం జరుగుతున్నా నోరు మూసుకుని చూస్తున్నారని అన్నారు. బీఆర్ఎస్ పార్టీ ఎంపీలను గెలిపిస్తే కేంద్రంతో కొట్లాడైనా నిధులను సాధించుకునేవారని అన్నారు.
ఇప్పటికైనా కాంగ్రెస్, బీజేపీ ఎంపీలు నిధులు సాధించుకునే వరకు కేంద్రంతో కొట్లాడాలన్నారు. కార్యక్రమంలో పెరుమాండ్ల సత్యం, పోతరాజు కర్ణాకర్, సమ్మయ్య, అశోక్, తిరుపతి, రామకోటి, మల్లారెడ్డి, సంపత్, కృష్ణ, నవీన్, రవి తదితరులు పాల్గొన్నారు. అదేవిధంగా భూపాలపల్లి, మహబూబాబాద్, కేసముద్రం, గార్ల, తొర్రూరు, భీమదేవరపల్లి మండలం ముల్కనూరు, వరంగల్ నగరంలోని శివనగర్ రైల్వే అండర్ బ్రిడ్జి, తదితర చోట్ల సీపీఐ ఆధ్వర్యంలో ఆందోళనలు నిర్వహించారు.
కార్యక్రమంలో సీపీఐ పార్టీ భూపాల పల్లి పట్టణ కార్యదర్శి సోత్కు ప్రవీణ్ కుమార్, మహబూబాబాద్ జిల్లా అధ్యక్షుడు విజయ్ సారథి, జిల్లా కార్యవర్గ సభ్యులు ఓమ భిక్షపతి, మండల కార్యదర్శి బందు మహేందర్, రాష్ట్ర సమితి సభ్యుడు కట్టెబోయిన శ్రీనివాస్ తదితరులు పాల్గొన్నారు. హనుమకొండలోని సుబేదారిలోని ఆర్ట్స్ కళాశాల ఎదుట ఎస్ఎఫ్ఐ ఆధ్వర్యంలో, పరకాలలో కాంగ్రెస్ నాయకులు కేంద్ర ప్రభుత్వ దిష్టిబొమ్మను దహనం చేశారు. ఆత్మకూరులో ప్రధాన మంత్రి నరేంద్రమోడీ దిష్టిబొమ్మను దహనం చేసి, కేంద్ర ప్రభుత్వానికి వ్యతిరేకంగా నినాదాలు చేశారు. సంగెం మండల కాంగ్రెస్ పార్టీ ఆధ్వర్యంలో ప్రధాని మోదీ దిష్టిబొమ్మ ను దహనం చేశారు.