చిల్పూరు, జూన్ 8 : వీధి కుక్కల దాడిలో బాలుడు మృతిచెందిన ఘటన మండలంలోని లూనావత్తండాలో శనివారం జరిగింది. స్థానికుల కథనం ప్రకారం.. ఫతేపూర్ గ్రామ పంచాయతీ పరిధిలోని లూనావత్తండాకు చెందిన గుగులోత్ మధు, సరిత దంపతుల కుమారుడు గుగులోత్ శివరామ్ (6) శనివారం తన తండ్రితో కలిసి ట్రాక్టర్పై పొలం వద్దకు వెళ్లాడు.
తన వెంట వద్దు..ఇంటికి వెళ్లమని మధు చెప్పగా శివరామ్ ఒక్కటే ఇంటికి బయలుదేరాడు. ఈ క్రమంలో దారిలో వీధి కుక్కలు దాడి చేయడంతో బాలుడు అక్కడికక్కడే మృతి చెందాడు. తండ్రి మధు ఇంటికి వచ్చి కొడుకు కోసం వెతుకుతుండగా, వీధి కుక్కలు దాడిలో మృతి చెందినట్లు స్థానికులు తెలుపడంతో బోరున విలపించాడు. ఈ ఘటన స్థానికంగా విషాదాన్ని నింపింది.