హనుమకొండ/హనుమకొండ చౌరస్తా, మే 14: వరంగల్-ఖమ్మం-నల్గొండ పట్టభద్రుల ఎమ్మెల్సీ ఎన్నికలో తనకు తొలి ప్రాధాన్యత ఓటు వేసి ప్రశ్నించే గొంతుకను గెలిపించాలని బీఆర్ఎస్ అభ్యర్థి ఏనుగుల రాకేశ్రెడ్డి కోరారు. ఈమేరకు మంగళవారం ఆయన హనుమకొండలోని ఎల్ఐసీ, బీఎస్ఎన్ఎల్ కార్యాలయాల్లో ఉద్యోగులను, జిల్లా గ్రంథాలయంలో పోటీ పరీక్షలకు సన్నద్ధమవుతున్న ఉద్యోగార్థులను కలిశారు. సెంట్రల్ లైబ్రరీలో వారితో మమేకమై ఆయన భోజనం చేశారు. ఈ సందర్భంగా ఆయన మాట్లాడుతూ సామాన్య నుంచి వచ్చిన తనకు ఉద్యోగుల సమస్యలపై అవగాహన ఉందని, వారి సమస్యల పరిష్కారానికి కృషిచేస్తానని చెప్పారు. గతంలో ఎమ్మెల్సీగా చుకా రామయ్య, ఎల్ఎస్ రాజు, ప్రొఫెసర్ నాగేశ్వర్, రాజేశ్వర్రావు, దిలీప్కుమార్, పల్లా రాజేశ్వర్రెడ్డి అయ్యారని, ఈ తీర్పులు చూస్తే గ్రాడ్యుయేట్స్ ఎవరిని కోరుకుంటున్నారో స్పష్టమవుతోందని అన్నారు.
అధికార పార్టీ అభ్యర్థిని గెలిపిస్తే వారికే ఉపయోగం ఉంటుందని, నిరుద్యోగుల సమస్యలపై రాష్ట్ర ప్రభుత్వాన్ని నిలదీయలేరని, ప్రతిపక్ష అభ్యర్థిని గెలిపిస్తే అధికారపార్టీని నిలదీయడంతో పాటు సమస్యల పరిష్కారానికి చేసే అవకాశం ఉంటుందని పేర్కొన్నారు. నాలుగు గోడల మధ్య ఉండి స్రీన్ చదివే వ్యక్తిని కాకుండా ప్రజల్లో ఉండే తనను గెలిపించాలని కోరారు. జీవో 46ని రద్దు చేస్తామని ఎన్నికల్లో కాంగ్రెస్ ఇచ్చిన హామీని నెరవేర్చేవరకూ విద్యార్థుల పక్షాన యుద్ధం చేస్తానని హామీ ఇచ్చారు. ఆయన వెంట కార్పొరేటర్ రవినాయక్, బీఆర్ఎస్వీ నాయకులు కొమురన్న, జెట్టి రాజేందర్, పిన్నింటి విజయ్, తదితరులు ఉన్నారు.