టేకుమట్ల, జూన్ 25 : సాహిత్యంతో ప్రజలను చైతన్య పరుస్తూ ఏదైనా సాధించవచ్చని భూపాలపల్లి ఎమ్మెల్యే గండ్ర వెంకటరమణారెడ్డి, బీఆర్ఎస్ జిల్లా అధ్యక్షురాలు గండ్ర జ్యోతి, రాష్ట్ర జలవనరుల సంస్థ చైర్మన్ వీరమల్ల ప్రకాశ్ అన్నారు. మండలంలోని వెలిశాలలో జానపద, సినీగేయ రచయిత మిట్టపల్లి సురేందర్ రచించిన ‘తల్లీ నా వెలిశాల.. నీకు ఉన్నది చరిత్ర చాలా’ పాటకు 20 వసంతాలు పూర్తి అయిన సందర్భంగా వెలిశాల ప్రభుత్వ పాఠశాలలో నిర్వహించిన పాటకు పట్టాభిషేకం కార్యక్రమానికి వారు హాజరై మాట్లాడారు. నాడు అణచివేతకు గురై అన్నలే దిక్కు అని ఉద్యమ బాట పట్టిన యువతరం, నేడు ఉద్యోగాల బాట పట్టిందన్నారు. అణచివేత గురైన పల్లెలపై పాటలు రాసిన కవుల గలాలు నేడు మూగబోతున్నాయని, అణచివేత నిర్మూలించబడి, అభివృద్ధి జరుగుతున్న నేపథ్యంలో దానిపై పాటలు రాయాలన్నారు.
మారుమూల గ్రామంలో పుట్టిన మిట్టపల్లి సురేందర్ తన సాహిత్య ప్రతిభతో ఎన్నో పాటలు రాశారని, మరిన్ని రాసి రాణించాలని అందుకు తమ సహాయసహకారాలు ఎల్లప్పుడూ ఉంటాయన్నారు. సురేందర్ మాట్లాడుతూ గ్రా మాల్లో స్వయంగా అనుభవించిన సన్నివేశాల నుంచే తన పాటలు పురుడుపోసుకున్నాయన్నారు. తాను రాసిన ప్రతి పాటలో అణగారిన వర్గాల ప్రజల బాధలు ఉట్టిపడుతాయన్నారు. నేడు జరుగుతున్న అభివృద్ధి పై పాటలు రాస్తూ ప్రజలకు ప్రభుత్వ సంక్షేమ పథకాలు అందేలా కృషి చేస్తామన్నారు. కార్యక్రమంలో ఓయూ ప్రొఫెసర్ కాశీం, విరసం నేత శాఖమూరి రవి, ఎన్ఆర్ఐ వెంకటేశ్వర్రెడ్డి, కళాకారులు గర్జన, వంతడుపుల నాగరాజు, అనితా నాగరాజు, మురళి, పాటమ్మతోనే రాంబాబు, రేలారే గంగ, ఎంపీపీ, జడ్పీటీసీలు, సర్పంచులు పాల్గొన్నారు.