నెక్కొండ, జూలై 19: రైతులు వ్యవసాయంలో ఆధునిక పద్ధతులు పాటిస్తే లాభసాటిగా ఉంటుందని జిల్లా వ్యావసాయ అధికారి ఉషాదయాళ్ సూచించారు. రెడ్లవాడలో కుప్పల బాలరాజు వ్యవసాయ క్షేత్రంలో శుక్రవారం యంత్రాలతో వరినాట్లు వేసే విధానంపై రైతు క్షేత్ర ప్రదర్శన నిర్వహించారు. ఈ సందర్భంగా ఆమె హాజరై మాట్లాడుతూ యంత్రాలతో నాట్లు వేస్తే ఎకరాకి కేవలం రూ. 5 వేల ఖర్చు మాత్రమే అవుతుందని, నారుమడి, నారు మోసే ఖర్చులు తగ్గుతాయని, ఎకరానికి 12 కిలోల విత్తనం మాత్రమే సరిపోతుందని వివరించారు. యాంత్రీకరణ పద్ధతిలో నాటు వేయడం వల్ల సాళ్లలోకి గాలి, వెలుతురు విశాలంగా ప్రవేశించి చీడపీడల ఉధృతి తగ్గుతుందని, తద్వారా దిగుబడి పెరుగుతుందని సూచించారు. కార్యక్రమంలో ఏవో నాగరాజు, ఏఈవో లోచన్, రైతులు మాలోత్ శివలాల్, మూడు శ్రీను, బండి రాజు, సభావత్ రంజిత్, లింగయ్య, గట్టయ్య పాల్గొన్నారు.
నర్సంపేటరూరల్: రైతులు వ్యవసాయ అధికారుల సూచనలు, సలహాలను విధిగా పాటించాలని జిల్లా వ్యవసాయ అధికారి ఉషాదయాళ్ అన్నారు. మండలంలోని రాజుపేట, ముత్తోజిపేటలో ఆమె వరి, ప త్తి, మక్కజొన్న పంటలను పరిశీలించారు. వరి, పత్తి, వేరుశనగ, మక్కజొన్న పంటల సాగులో రైతులు ఆధునిక పద్ధతులు పా టించాలన్నారు. వరి సాగు చేసే ముందు పచ్చిరొట్టను సాగు చేసి భూమిలో కలియదున్నాలని సూచించారు. వరిలో వచ్చే వివిధ తెగుళ్ల నివారణపై రైతులకు అవగాహన ఉండాలన్నారు. ఆమె వెంట ఏవో కృష్ణకుమార్, ఏఈవోలు మెండు అశోక్, మండల భరత్, నవీన్ ఉన్నారు.