ఐనవోలు, జూన్ 18 : హనుమకొండ జిల్లా ఐనవోలు మండలం వెంకటాపురం గ్రామంలో మొలకెత్తని మక్కజొన్న వ్యవసాయ క్షేత్రాన్ని మంగళవారం స్థానిక ఏవో అడుప కవిత పరిశీలించారు. ఒంటిమామిడిపల్లికి చెందిన రైతు బండారి శ్రీను వెంకటాపురం శివారులో 1.20 ఎకరాల భూమిని కౌలు తీసుకొని ఓ కంపెనీకి చెందిన మక్కజొన్న విత్తనాలను మండలకేంద్రంలోని ఓ డీలర్ వద్ద కొనుగోలు చేసి విత్తగా 90శాతం మొలకెత్తలేదు. దీంతో తనకు రూ. 25 వేల వరకు నష్టం వాటిల్లిందని సోషల్ మీడియాలో వీడియో పోస్టు చేయగా వైరల్గా మారింది. ఇందుకు సంబంధించి ఈనెల 16న ‘మొలకెత్తని మక్కజొన్న విత్తనాలు’ శీర్షికన నమస్తే తెలంగాణలో ప్రచురితమైన కథనానికి ఆమె స్పందించారు. ఈ మేరకు మక్కజొన్న విత్తనాల మొలక శాతం తెలుసుకోవడానికి నమూనాలను సేకరించి ల్యాబ్కు పంపినట్లు ఆమె తెలిపారు. ల్యాబ్ రిపోర్టు ఆధారంగా బాధ్యులపై చర్యలు తీసుకుంటామని కవిత పేర్కొన్నారు. కాగా, మండలంలోని ఏ రైతైనా విత్తనాలు మొలకెత్తలేదని డీలర్ల దృష్టికి తీసుకొస్తే గుట్టు చప్పుడు కాకుండా అదే కంపెనీకి చెందిన మరో మక్కజొన్న విత్తనాల బస్తాలను ఉచితంగా ఇచ్చి పంపుతున్నట్లు రైతులు చర్చించుకుంటున్నారు.