ములుగు, జూన్ 9 (నమస్తే తెలంగాణ): పోలీసులే లక్ష్యంగా మావోయిస్టులు ఏర్పాటు చేసిన మందుపాతరలతో సామాన్యులతోపాటు వన్యప్రాణులు చనిపోతున్నట్లు ఎస్పీ డాక్టర్ పీ శబరీష్ ఆదివారం ఒక ప్రకటనలో తెలిపారు. తెలంగాణ-ఛత్తీస్గఢ్ రాష్ట్ర సరిహద్దుల్లోని వెంకటాపురం(నూగూరు) మండల పరిధి అటవీ ప్రాంతంలో కొన్ని రోజులుగా ముందస్తు చర్యల్లో భాగంగా పోలీస్ బృందాలు తనిఖీలు నిర్వహిస్తున్నట్లు తెలిపారు. వీరభద్రాపురం అటవీ సమీపంలో సామాన్యులు తిరిగే కాలిబాటల వెంట మావోయిస్టులు అమర్చిన నాలుగు మందు పాతరలను ఆదివారం ఉదయం గుర్తించినట్లు పేర్కొన్నారు. అందులో మూడు పేలడంతో వన్య ప్రాణులైన ముళ్లపంది, కొండెంగ, పెంపుడు కుక్క చనిపోగా కళేబరాలను గుర్తించినట్లు వివరించారు. అక్కడే అమర్చి ఉన్న మరో మందుపాతరను బాంబు డిస్పోజల్ టీమ్ నిర్వీర్యం చేసిందని వెల్లడించారు. మావోయిస్టులకు ప్రజలు ఎవరూ సహకరించొద్దని, వారి సమాచారం తెలిస్తే పోలీసులకు తెలియజేయాలని ఎస్పీ కోరారు.