ఎల్లారెడ్డి/ఎల్లారెడ్డి రూరల్, జూలై 19: పొలంలో నాటు వేయడానికి వెళ్లిన యువరైతు విద్యుత్తు షాక్తో మృతిచెందిన ఘటన కామారెడ్డి జిల్లా ఎల్లారెడ్డి మండలం అన్నాసాగర్లో శుక్రవారం చోటుచేసుకున్నది. అన్నాసాగర్కు చెందిన కొనగొల్ల రవి (35)కి భార్య చంద్రకళ, ఇద్దరు పిల్లలు ఉన్నారు. శుక్రవారం తన పొలంలో నాటు వేయడానికి గంపలో వరి నారు పెట్టుకొని వెళ్తుండగా, 11 కేవీ విద్యుత్తు వైర్లు నారుకు తగిలి షాక్ రావడంతో రవి అక్కడే పడిపోయాడు.
స్థానికులు వెంటనే ఎల్లారెడ్డి దవాఖానకు తరలించగా, అప్పటికే మృతిచెందినట్టు వైద్యులు నిర్ధారించారు. అధికారుల నిర్లక్ష్యంతోనే రవి మృతి చెందాడని, వారిపై చర్యలు తీసుకోవాలని గ్రామస్తులు ఏడీఈ సుదర్శన్రెడ్డికి ఫిర్యాదు చేశారు. 11కేవీ విద్యుత్తు వైర్లు తక్కువ ఎత్తులో ఉన్నాయని, వాటిని సరిచేయాలని నెల క్రితమే ఫిర్యాదు చేసినా నిర్లక్ష్యం చేయడంతోనే రవి మృతి చెందాడని ఆగ్రహం వ్యక్తం చేశారు.