దుబ్బాక, మే24: ‘ఇంటికి వెలుగు ఇల్లాలు.. ఆ ఇల్లాలు ఆరోగ్యంగా ఉంటేనే కుటుంబం ఆరోగ్యంగా ఉంటుంది. అందుకే.. మన ముఖ్యమంత్రి కేసీఆర్ మహిళా ఆరోగ్యం, సంక్షేమానికి పెద్దపీట వేశారు’ అని ఆర్థిక, వైద్యారోగ్య శాఖల మంత్రి హరీశ్రావు స్పష్టం చేశారు. బుధవారం సిద్దిపేట జిల్లా దుబ్బాక మండలం పోతారంలో రుతుప్రేమపై నిర్వహించిన అవగాహన కార్యక్రమంలో మెదక్ ఎంపీ కొత్త ప్రభాకర్రెడ్డితో కలిసి మంత్రి హరీశ్రావు పాల్గొన్నారు. ఈ సందర్భంగా ఆయన మాట్లాడుతూ.. మహిళా సాధికారత కోసం సీఎం కేసీఆర్ ఎన్నో సంక్షేమ పథకాలు ప్రవేశపెట్టారని గుర్తు చేశారు. మహిళల ఆరోగ్యం కోసం సర్కారు దవాఖానల్లో ఆరోగ్యలక్ష్మి కార్యక్రమాన్ని తీసుకొచ్చామని చెప్పారు. ప్రతి మంగళవారం ఆరోగ్య కేంద్రాల్లో మహిళలకు వైద్య పరీక్షలతో పాటు వైద్యం అందిస్తున్నారని తెలిపారు.
బీపీ, షుగర్ వ్యాధిగ్రస్తులకు ఎన్సీడీ కిట్లు అందిస్తున్నట్టు వివరించారు. రుతుప్రేమపై మహిళలు అవగాహన పెంచుకుని పర్యావరణంతోపాటు మహిళలు ఆరోగ్యాన్ని కాపాడుకోవాలని సూచించారు. గతంలో ప్రైవేట్ దవాఖానలో కాన్పుల కోసం రూ.50 వేల నుంచి రూ.60 వేల వరకు ఖర్చు పెట్టేవారని, ఇపుడు అలాంటి పరిస్థితి లేదని చెప్పారు. సర్కారు దవాఖానలపై ప్రజలకు నమ్మకం పెరిగిందని మంత్రి అన్నారు. బిడ్డ్డను కాన్పు కోసం రూపాయి ఖర్చులేకుండా దవాఖానకు తీసుకెళ్లి, కేసీఆర్ కిట్తో తల్లీబిడ్డ్డలను ఇంటికి సురక్షితంగా తీసుకొస్తున్నారని వివరించారు. తల్లీబిడ్డ్డల ఆరోగ్యం కోసం న్యూట్రిషన్కిట్ పథకాన్ని వచ్చే నేల జూన్ 14న ప్రారంభిస్తున్నట్టు మంత్రి హరీశ్రావు ప్రకటించారు. కంటి వెలుగు కార్యక్రమంతో కంటి సంబంధిత సమస్యలు లేకుండాపోయాయని, తాను కూడా కంటి వెలుగు అద్దాలు వినియోగిస్తున్నట్టు మంత్రి తనవద్ద ఉన్న అద్దాలను చూపించారు. జూన్ నెలాఖరులో సొంత జాగా ఉన్న వారికి ఇల్లు కట్టుకునేందుకు రూ.3 లక్షలు ప్రభుత్వ సహాయం అందించనున్నట్టు తెలిపారు. కార్యక్రమంలో మెదక్ ఎంపీ కొత్త ప్రభాకర్రెడ్డి, సిద్దిపేట జడ్పీ చైర్పర్సన్ వెలేటి రోజాశర్మ, తదితరులు పాల్గొన్నారు.