హైదరాబాద్, జూన్ 21 (నమస్తే తెలంగాణ): గ్రామీణ మహిళలను పారిశ్రామికవేత్తలుగా తీర్చిదిద్దడమే ప్రభుత్వ లక్ష్యమని పంచాయతీరాజ్, గ్రామీణాభివృద్ధి శాఖ మంత్రి సీతక్క వెల్లడించారు. శుక్రవారం సచివాలయంలో రెండు మహిళా శక్తి క్యాంటీన్లను మంత్రి ప్రారంభించారు. ఈ సందర్భంగా ఆమె మాట్లాడుతూ ‘మహిళా శక్తి క్యాంటీన్లలో ఆహారం రుచి అమ్మ చేతి వంటలా ఉండాలి. నాణ్యతకు ప్రాధాన్యమివ్వాలి. ఇప్ప పువ్వు లడ్డులాంటి పల్లె రుచులను పట్టణాలకు పరిచయం చేయాలి. ఈ క్యాంటీన్లు ఓ బ్రాండ్గా ఎదిగి దేశానికే ఆదర్శంగా నిలువాలి’ అని సూచించారు. స్థానిక వనరులు, ప్రజల అవసరాలను దృష్టిలో ఉంచుకొని మహిళా శక్తి బిజినెస్ మాడల్స్ రూపొందిస్తామని, రానున్న ఐదేండ్లలో మహిళా సంఘాలకు బ్యాంకు రుణాలు అందిస్తామని మంత్రి తెలిపారు. మీ సేవ, ఆధార్ కేంద్రాలు, పౌల్ట్రీ, డెయిరీ వ్యాపారాలు, క్యాంటీన్లు, స్టార్టప్ల ఏర్పాటుకు అన్ని రకాల ప్రోత్సాహకాలు అందించడంతోపాటు వడ్డీలేని రుణ సౌకర్యాన్ని కూడా ప్రభుత్వం కల్పిస్తుందని చెప్పారు. ఈ కార్యక్రమంలో ఎమ్మెల్సీ తీన్మార్ మల్లన్న, ప్రభుత్వ ప్రధాన కార్యదర్శి శాంతికుమారి, పంచాయతీరాజ్ శాఖ ముఖ్యకార్యదర్శి సందీప్ కుమార్ సుల్తానియా, ముఖ్యమంత్రి కార్యదర్శులు మానిక్ రాజ్, చంద్రశేఖర్రెడ్డి, సెర్ప్ డైరెక్టర్లు గోపాల్రావు, నర్సింహారెడ్డి తదితరులు పాల్గొన్నారు.