మెదక్ జిల్లా చిన్నశంకరంపేట పట్టణంలోని గాంధీనగర్ కాలనీలో మూడు, నాలుగు రోజుల నుంచి తాగునీరు రావడం లేదని మహిళలు ఆగ్రహించారు. ఖాళీ బిందెలతో మంగళవారం మెదక్ చేగుంట ప్రధాన రహదారిపై రాస్తారోకో నిర్వహించారు. ఈ సందర్భంగా వారు మాట్లాడుతూ.. నాలుగు రోజుల నుంచి కాలనీకి నీళ్లు రావడంలేదని అధికారులకు విన్నవించినా పట్టించుకోవడం లేదని, తాగునీటి కోసం వ్యవసాయ బోరుబావులను ఆశ్రయించాల్సిన దుస్థితి నెలకొన్నదని మండిపడ్డారు. కాలనీలో బోరు మోటర్ కాలిపోయి 15 రోజులు గడుస్తున్నా దానికి మరమ్మతులు చేయించడం లేదని చెప్పారు. మంచినీటి సమస్యను పరిష్కరించే వరకు రాస్తారోకోను విరమించేది లేదని చెప్పారు. ఎంపీడీవో దామోదర్ సంఘటనా స్థలానికి చేరుకొని ఆందోళనకారులను సముదాయించారు. ట్యాంకర్ల ద్వారా నీళ్లను సరఫరా చేస్తామని, కాలిపోయిన బోరు మోటర్ను బాగు చేయిస్తామని చెప్పడంతో మహిళలు ఆందోళన విరమించారు.
– చిన్నశంకరంపేట