ఉట్నూర్, జూన్ 15 : ఆదిలాబాద్ జిల్లాలో మూడు రోజుల క్రితం జరిగిన ప్రభుత్వ ఉపాధ్యాయుడి హత్య కేసు మిస్టరీ వీడింది. వివాహేతర సంబంధానికి అడ్డు వస్తున్నాడని భార్యే సుపారి ఇప్పించి భర్తను కడతేర్చినట్టు పోలీసుల విచారణలో వెలుగుచూసింది. నార్నూర్ మండలం నాగల్కొండకు చెందిన ప్రభుత్వ ఉపాధ్యాయుడు జాదవ్ గజేందర్కు విజయలక్ష్మితో 2017లో వివాహమైంది. విజయలక్ష్మి నిజామాబాద్లో డిగ్రీ చదివేటప్పుడు రాథోడ్ మహేశ్తో ప్రేమలో పడింది. వీరి పెండ్లికి పెద్దలు ఒప్పుకోలేదు. ఆ తరువాత విజయలక్ష్మిని గజేందర్తో వివాహం జరిపించారు. అప్పటినుంచి వీరి ప్రేమ వ్యవహారం కాస్తా వివాహేతర సంబంధంగా మారింది. ఇది తెలిసిన గజేందర్ తన సొంత మండలమైన నార్నూర్ పరిసరాలకు బదిలీ చేసుకునే ఆలోచనలో ఉన్నాడు. ఇదే జరిగితే తన వ్యవహారం నడవదన్న కోపంతో ప్రియుడితోకలిసి హత్యకు ప్రణాళిక వేసింది. ఈ నెల 12న గజేందర్ జైనథ్ మండలం కెనాల్ మెడిగూడలోని జడ్పీహెచ్ఎస్లో విధులకు హాజరై తిరిగి వస్తుండగా.. సుపారీ గ్యాంగ్తో బైక్ను ఢీకొట్టించింది. అతడు కిందపడగానే పొలాల్లోకి లాక్కెళ్లి బండరాళ్లతో కొట్టి హత్యచేసినట్టు డీఎస్పీ తెలిపారు. నిందితులను రిమాండ్కు పంపారు.