హైదరాబాద్, జూన్ 11 (నమస్తే తెలంగాణ): రాష్ట్రంలో ఆర్థికశాఖ వద్ద పేరుకుపోయిన బిల్లుల బకాయిలు చెల్లించకుండా ప్రభుత్వం చోద్యం చూ స్తున్నది. మెడికల్ బిల్లులు, సాలరీ ఏరియర్స్, ఇన్సూరెన్స్, జీపీఎఫ్ వంటి అ నేక రూపాల్లో ఉన్న బిల్లులు సకాలంలో చెల్లించకుండా ఆర్థిక శాఖ అధికారులు నిర్లక్ష్యంగా వహిస్తున్నారు. సచివాలయంలో అర్జీలు ఇస్తున్నప్పటికీ పట్టించుకునే వారు ఎవరూ లేరని, కనీసం సరైన సమాధానం చెప్పేవాళ్లు కూడా ఎవరూ లేకుండా పోతున్నారని బాధితులు కన్నీరు పెట్టుకుంటున్నారు.
మూడు నెలలుగా రాష్ట్రంలో పార్లమెంట్ ఎన్నికల పేరుతో బిల్లులు చెల్లించకుండా సర్కారు కాలయాపన చేసింది. ఎన్నికల ప్రక్రియ పూర్తి కావడం, ఎన్నికల కోడ్ ముగిసిన నేపథ్యంలో బిల్లుల కోసం బాధితులు మళ్లీ రాష్ట్ర సచివాలయంలోని ఆర్థికశాఖ అధికారుల చుట్టు తిరుగుతున్నారు. టోకెన్ నంబర్లతో ఆయా కార్యాలయాల్లో ఆర్జీలతోపాటు టోకెన్ నంబర్లను ఇస్తున్నారు. రాష్ట్ర సచివాలయం సిబ్బందికి కూడా సకాలంలో బిల్లులు చెల్లించడం లేదంటూ సచివాలయం ఉద్యోగులు సైతం ఆందోళన వ్యక్తం చేస్తున్నారు.