ఖమ్మం, డిసెంబర్ 18 (నమస్తే తెలంగాణ ప్రతినిధి): ప్రజలకు ఇచ్చిన మాట ప్రకారం తాము ప్రకటించిన ఆరు గ్యారంటీలను తమ ప్రభుత్వం కచ్చితంగా అమలు చేస్తుందని రెవెన్యూ, గృహనిర్మాణ, సమాచార పౌరసంబంధాల శాఖ మంత్రి పొంగులేటి శ్రీనివాసరెడ్డి స్పష్టంచేశారు. ఖమ్మం కలెక్టరేట్లో కలెక్టర్ వీపీ గౌతమ్, పోలీస్ కమిషనర్ విష్ణు ఎస్ వారియర్తో కలిసి సోమవారం మంత్రి మీడియాతో మాట్లాడారు. రాష్ట్ర ఆర్థిక పరిస్థితి ఇబ్బందికరంగా ఉన్నప్పటికీ ప్రజా సంక్షేమ పథకాలను ఆటంకం లేకుండా అమలుచేస్తామని తెలిపారు. ఆరు గ్యారెంటీల్లో రెండు గ్యారంటీలను ఇప్పటికే అమలు చేస్తున్నామని, ఈ నెల 28 వరకు మరో రెండు గ్యారెంటీల అమలును ప్రారంభిస్తామని చెప్పారు. సంక్రాంతి వరకు మిగతా రెండు గ్యారెంటీలను కూడా అమలు చేసేందకు ప్రణాళికలు సిద్ధం చేశామని వివరించారు. పంచాయతీ ఎన్నికలు నిర్వహించే అంశంపై ప్రభుత్వం తుది నిర్ణయం తీసుకోలేదని పేర్కొన్నారు. రాష్ట్ర ఆర్థిక పరిస్థితిపై ఈనెల 20న అసెంబ్లీలో శ్వేతపత్రం విడుదల చేస్తామని తెలిపారు. ప్రభుత్వ ఆస్తులు, భూములను ఆక్రమించిన వారిపై, నిధులు కొల్లగొట్టిన వారిపై చర్యలు తప్పవని హెచ్చరించారు. ప్రతి ఒక్కరూ తమ సమస్యలను వివరించుకునేందకు అవకాశం కల్పిస్తామని చెప్పారు. ధరణిలో ఉన్న లోపాలను సరిచేయాల్సిన అవసరం ఉన్నదని అభిప్రాయపడ్డారు. ఇసుక, మట్టి, ఇతర మైనింగ్ మాఫియాపై ఉక్కు పాదం మోపుతామని అన్నారు. ప్రతి పేద కుటుంబానికీ ఇల్లు మంజూరు చేస్తామని తెలిపారు. సంక్రాంతి నాటికి ఇండ్ల స్థలాలు, నూతన రేషన్ కార్డుల మంజూరును కూడా ప్రారంభిస్తామని తెలిపారు.