రైతు రుణమాఫీ పూర్తయిన వెంటనే ఆగస్టు 15 తర్వాత ఉపాధ్యాయ, ఉద్యోగులకు బకాయి ఉన్న డీఏను ప్రకటిస్తామని ముఖ్యమంత్రి సలహాదారు వేం నరేందర్ రెడ్డి తెలిపారు. బకాయి ఉన్న డీఏల్లో ఒకటా, రెండా ఎన్ని ఇవ్వాలన్నది ముఖ్యమంత్రి నిర్ణయిస్తారని తెలిపారు. యూఎస్పీ, జాక్టో, టీటీజేఏసీ తదితర ఉపాధ్యాయ సంఘాల ప్రతినిధులతో శుక్రవారం నాడు వేం నరేందర్ రెడ్డి చర్చలు జరిపారు. ఈ సందర్భంగా బదిలీలు, పదోన్నతుల్లో ఏర్పడిన సమస్యలపై అప్పీలును సత్వరమే పరిష్కరించాలని ఉపాధ్యాయ సంఘాల ప్రతినిధులు కోరారు. ఇందుకు సీఎం సలహాదారు సానుకూలంగా స్పందించారు. దీనిపై అధికారులను ఆదేశిస్తామని చెప్పారు.
అన్ని సంఘాలు చర్చించి ప్రాధాన్యత క్రమంలో సమస్యల జాబితాను ఉమ్మడిగా రూపొందించి ఇవ్వాలని ఈ సందర్భంగా సంఘాల ప్రతినిధులకు వేం నరేందర్ రెడ్డి సూచించారు. మూడు జేఏసీల ప్రతినిధులు, అధికారులతో సమావేశం నిర్వహించి సాధ్యాసాధ్యాలపై చర్చించిన అనంతరం ముఖ్యమంత్రితో సమావేశం ఏర్పాటు చేసి సమస్యలను పరిష్కరించుకుందామని తెలిపారు.