హైదరాబాద్, జూలై 23(నమస్తే తెలంగాణ) : కేంద్ర బడ్జెట్లో తెలంగాణకు తీవ్ర అన్యాయం జరిగిందని బీఆర్ఎస్ నాయకుడు, మాజీ ఎంపీ వినోద్ కుమార్ ఆవేదన వ్యక్తంచేశారు. రాష్ట్ర పునర్విభజన చట్టం ప్రకారం ఏపీకి భారీగా నిధులు కేటాయించినా, తెలంగాణ పదాన్ని కూడా ఉచ్ఛరించకపోవడం బాధాకరమని పేర్కొన్నారు. ‘ఏపీ రాజధాని అమరావతి నిర్మాణానికి ఏటా రూ.15 వేల కోట్లు కేటాయిస్తామన్నారు. శ్రీకాకుళం-చెన్నై కారిడార్ను ప్రస్తావించారు.
తెలంగాణ విషయంలో హైదరాబాద్-బెంగుళూరు కారిడార్ ప్రస్తావించినా ఇందులో 150 కిలోమీటర్లు మాత్రమే తెలంగాణలో ఉంటుంది. మిగతాదంతా ఏపీలోని రాయలసీమ ప్రాంతంలో ఉంటుంది. ఒకవేళ తెలంగాణకు ఏదైనా ప్రాజక్టు ఇవ్వాలనుకుంటే హైదరాబాద్-నాగపూర్ కారిడార్ ప్రకటిస్తే బాగుండేది. దీనివల్ల యావత్ తెలంగాణకు, ముఖ్యంగా ఉత్తర తెలంగాణ ప్రాంతానికి ఎంతో ఉపయోగకరంగా ఉండేది’ అని అభిప్రాయపడ్డారు.
పోలవరం ప్రాజక్టుకు జాతీయ హోదా ఇవ్వడంతోపాటు ఏపీకి మరింత సహకారం అందిస్తామని చెప్పారని, తెలంగాణలో గోదావరి, కృష్ణా నదులపై జాతీయ ప్రాజక్టుల నిర్మాణానికి చాలా కాలంగా చేస్తున్న డిమాండ్ను ఆర్థిక మంత్రి బడ్జెట్లో ప్రస్తావించకపోవడం దురదృష్టకరమని వాపోయారు. ఏపీ, బీహార్లకు అత్యధికంగా కేటాయింపులు జరపడం స్పష్టంగా కనిపిస్తున్నదని చెప్పారు. పునర్విభజన చట్టంలో పొందుపరిచిన కాజీపేట కోచ్ ఫ్యాక్టరీ, బయ్యారం ఉక్కు కర్మాగారం, ఐఐఎం, నవోదయ విద్యాలయాలు, జాతీయ ప్రాజక్టులను కాంగ్రెస్, బీజేపీ సభ్యులు బడ్జెట్ చర్చ సందర్భంగా పట్టుబట్టి సాధించుకోవాలని కోరారు. తమ పార్టీ ఎంపీలు గతంలో పోరాడి కొన్ని సాధించగా, ఇంకా సాధించాల్సినవి ఉన్నాయని వివరించారు.