వాజేడు, జూన్ 4: ములుగు జిల్లా వాజేడు మండలంలోని జగన్నాథపురంలో మావోయిస్టులకు వ్యతిరేకంగా మంగళవారం గ్రామస్థులు ర్యాలీ నిర్వహించారు. గ్రామానికి చెందిన ఇల్లందుల ఏసు సోమవారం వంట చెరకు కోసం కొంగాల అడవిలోకి వెళ్లి మావోయిస్టులు అమర్చిన మందుపాతరపై ప్రమాదవశాత్తు కాలు పెట్టడంతో అది పేలి మృతి చెందిన నేపథ్యంలో నిరసన చేపట్టారు. జాతీయ రహదారిపై ఏసు కుటుంబసభ్యులతోపాటు బంధువులు, గ్రామస్థులు ర్యాలీ తీశారు. ‘మావోయిస్టుల పోరాటం అంటే.. అమాయకులు, మూగ జీవాలను చంపడమేనా? అడవుల్లో స్వేచ్ఛ గా తిరిగే హక్కు ఏజెన్సీవాసులకు లేదా?’ అంటూ వారికి వ్యతిరేకంగా నినాదాలు చేశారు.