హైదరాబాద్ జనవరి 5, (నమస్తే తెలంగాణ) : ఈశాన్య రాష్ర్టాల్లో త్వరలో జరుగనున్న అసెంబ్లీ ఎన్నికల భద్రత కోసం అదనపు పోలీస్ బలగాలను పంపించే అంశంపై కేంద్ర హోంశాఖ కార్యదర్శి అజయ్కుమార్ భల్లా గురువారం తెలంగాణతో పాటు పలు రాష్ర్టాల డీజీపీలతో వీడియో కాన్ఫరెన్స్ నిర్వహించారు. హైదరాబాద్ డీజీపీ కార్యాలయం నుంచి డీజీపీ అంజనీకుమార్ వీసీలో పాల్గొన్నారు. మేఘాలయ, నాగాలాండ్, త్రిపుర రాష్ర్టాలకు ఈ ఏడాది అసెంబ్లీ ఎన్నికలు నిర్వహించనున్నారు. సున్నిత ప్రాంతాలుగా పేరుగాంచిన ఈశాన్య రాష్ర్టాల్లో ఎన్నికలను సజావుగా నిర్వహించేందుకు కేంద్ర ప్రభుత్వం ఆయా రాష్ర్టాల నుంచి అదనపు బలగాలను మొహరించనుంది. ఈ మేరకు తెలంగాణ నుంచి కూడా అదనపు బలగాలను ఈశాన్య రాష్ర్టాలకు పంపాలని డీజీపీని కేంద్ర హోం శాఖ కార్యదర్శి కోరారు. ఈ వీసీలో శాంతి భద్రతల విభాగం అదనపు డీజీ ఎస్కే జైన్, బెటాలియన్స్ ఏడీజీ అభిలాష బిస్త్ పాల్గొన్నారు.