Telangana | హైదరాబాద్, జూలై 13 (నమస్తే తెలంగాణ): ఉద్యోగార్థుల ఆందోళనకు సంఘీభావంగా దీక్షలు చేస్తున్న వారిపై సీఎం రేవంత్రెడ్డి అనుచితవ్యాఖ్యలు చేస్తున్నారని నిరుద్యోగులు మండిపడుతున్నారు. పోటీ పరీక్షలు రాసేవారు మాత్రమే దీక్షల్లో పాల్గొనాలన్నట్టుగా మాట్లాడటం సమంజసం కాదని పేర్కొంటున్నారు. ముఖ్యమంత్రి వాదనే సరైనది అయితే.. ఏ సంబంధమున్నదని రేవంత్రెడ్డి, కాంగ్రెస్ అగ్రనేత రాహుల్గాంధీ, హస్తం పార్టీ నేతలు నిరుద్యోగుల పక్షాన దీక్షలో కూర్చున్నారని నిలదీస్తున్నారు.
నిరు డు నవంబర్లో రాత్రి 8.30 గంటలకు సిటీ సెంట్ర ల్ లైబ్రరీకి రాహుల్ గాంధీ అకస్మాత్తుగా వచ్చారని.. ఆయన ఏ పరీక్ష కోసం ప్రిపేర్ కావడానికి వచ్చాడో చెప్పాలని నిరుద్యోగులు సీఎం రేవంత్రెడ్డిని ప్రశ్నిస్తున్నారు. రాహుల్గాంధీ లైబ్రరీ నుంచి నేరుగా అశోక్నగర్ చౌరస్తాకు వెళ్లి ఆందోళన చేస్తున్న విద్యార్థులతో కలిసి నిరసనకు దిగారని.. ఆయనకు ఏ పరీక్షలో అన్యాయం జరిగిందని అక్కడికి వెళ్లారో సీఎం సమాధానం చెప్పాలని డిమాండ్ చేస్తున్నారు.
‘రాష్ట్రంలో కాంగ్రెస్ అధికారంలోకి వస్తే ఏడాదిలోనే రెండు లక్షల ఉద్యోగాలు భర్తీ చేస్తాం, జాబ్ క్యాలెండర్ విడుదల చేస్తాం’ అని రాహుల్గాంధీ ఇచ్చిన హామీలు ఏమయ్యాయో, ఆరు నెలలు గడిచినా ఒక్క ఉద్యోగానికీ నోటిఫికేషన్ ఇవ్వని రేవంత్రెడ్డి తక్షణం స్పందించాలని డిమాండ్ చేస్తున్నారు. విద్యార్థులకు అండగా ఉంటూ..పోరాటాలు చేస్తున్న విద్యార్థి ఉద్య మ నాయకులపై సీఎ రేవంత్రెడ్డి అనుచిత వ్యాఖ్యలను వెనక్కి తీసుకోవాలని కోరుతున్నారు.
విద్యార్థులను, విద్యార్థి ఉద్యమాలను హేళన చేస్తూ ముఖ్యమంత్రి మాట్లాడిన అహంకారపూరిత మాటలు తమను తీవ్ర మానసిక క్షోభకు గురిచేస్తున్నాయని నిరుద్యోగులు ఆవేదన వ్యక్తంచేస్తున్నారు. ప్రతి తలమాసినోడు పరీక్ష రద్దు చేయాలని కోరుతున్నాడని సీఎం రేవంత్రెడ్డి వ్యాఖ్యానించారని.. మరి ఎమ్మెల్సీ బల్మూరి వెంకట్కు ఏం సంబంధమున్నదని నీట్ పరీక్షను రద్దు చేయాలని డిమాండ్ చేస్తున్నారని ప్రశ్నించారు. నీట్ పరీక్ష రద్దు కోరుతూ బల్మూరి వెంకట్ రాజభవన్ను ముట్టడించారని, ఆయనకు నీట్ హాల్ టికెట్ దొరికిందా? అని నిలదీస్తున్నారు. ప్రొఫెసర్ కోదండరాం కూడా గ్రూప్-1 పరీక్ష రద్దుకు ఉద్యమాలు చేశారని, కానీ ఆయన ఆ పరీక్ష రాయడానికి సిద్ధపడలేదు కదా అని గుర్తుచేస్తున్నారు. నిరుడు మార్చిలో నిరుద్యోగుల కోసం గాంధీభవన్లోని గాంధీ విగ్రహం వద్ద పీసీసీ అధ్యక్షుడిగా రేవంత్రెడ్డి మౌన దీక్షకు కూర్చున్నారని, ‘మీరు ఏ పరీక్ష రాయడం కోసం పోరాడారో వివరించాలి’ అని డిమాండ్ చేస్తున్నారు.
నిరుద్యోగులు ధైర్యం కోల్పోవద్దని, అండగా ఉంటామని కాంగ్రెస్ ముఖ్యనేత రాహుల్గాంధీ నాడు భరోసా ఇచ్చారని, ఇప్పుడు తాము అదే అశోక్నగర్ చౌరస్తాలో ధర్నా చేస్తుంటే రాహుల్గాంధీ ఏం చేస్తున్నారని నిలదీస్తున్నారు. ఇప్పుడు కూడా హైదరాబాద్ వచ్చి తమను ఓదార్చాలని డిమాండ్ చేస్తున్నారు. నాడు నిరుద్యోగులతో కలిసి చాయ్ తాగుతూ ముచ్చటించిన రాహుల్గాంధీ.. మళ్లీ తమ సమస్యలు వింటూ చాయ్ తాగేందుకు రావాలని కోరుతున్నారు. నాడు రాహుల్ గాంధీ ఇచ్చిన ధైర్యంతోనే నేటికీ జాబ్ క్యాలెండర్ కోసం ఎదురు చూస్తున్నామని పేర్కొన్నారు.
హైదరాబాద్లోని అశోక్నగర్లో వివిధ పోటీ పరీక్షలకు సిద్ధమవుతున్న యువతను కలిశాను. తెలంగాణ వస్తే తమకు కొలువులు వస్తాయని ఆశించామని, రాష్ట్రం వచ్చి పదేండ్లయినా తమ ఆకాంక్షలు నెరవేరలేదని వారు ఆవేదన వ్యక్తం చేయడం నన్ను కలిచివేసింది. కేసీఆర్ పదేండ్ల పాలనలో తెలంగాణ యువతకు న్యాయం జరగలేదు. 30 లక్షల మంది నిరుద్యోగ యువత తీవ్రంగా నష్టపోయారు. వారు కొట్లాడి తెచ్చుకున్న తెలంగాణలోనే వారికి కొలువులు రాని దుస్థితి. అందుకే వారి కలలు సాకారం అయ్యేలా.. కాంగ్రెస్ పార్టీ రూపొందించిన జాబ్ క్యాలెండర్ను వారికి చూపించి వారిలో భరోసా నింపే ప్రయత్నం చేశాను. తెలంగాణలో కాంగ్రెస్ ప్రభుత్వం ఏర్పడిన ఏడాదిలోపే 2 లక్షల నియామకాలను పూర్తి చేసి యువతకు ఇచ్చిన మాట నిలబెట్టుకుంటాం.
-రాహుల్ గాంధీ