ఖైరతాబాద్, మే 23 : నిరుద్యోగులు కాంగ్రెస్కు ఓటు వేయరని నిరుద్యోగుల బస్సు యాత్ర కన్వీనర్ జనార్దన్ అన్నారు. కాంగ్రెస్ అధికారంలోకొచ్చి ఆర్నెళ్లు అవుతున్నా ఉద్యోగాల భర్తీ ఊసే లేదని.. ఒక్క నోటిఫికేషన్ ఇవ్వలేదని విమర్శించారు. సీఎం రేవంత్రెడ్డి ప్రకటించిన జాబ్ క్యాలెండర్ ఉత్తిదేనని నిరుద్యోగులకు స్పష్టత వచ్చిందని పేర్కొన్నారు.
హైదరాబాద్ సోమాజిగూడ ప్రెస్క్లబ్లో గురువారం నిరుద్యోగుల బస్సు యాత్ర కోకన్వీనర్లు శరత్, యుగేందర్, గోపాల్తో కలిసి ఆయన మాట్లాడుతూ.. కేసీఆర్ ప్రభుత్వం నోటిఫికేషన్లు ఇచ్చి.. పరీక్షలు నిర్వహించి.. ఫలితాలిస్తే… అధికారంలోకొచ్చి నాలుగు రోజులు గడవకముందే ఆ ఉద్యోగాలను భర్తీ చేసి… అంతా తామే చేశామని చెప్పుకొంటున్న కాంగ్రెస్ ప్రభుత్వానిది సిగ్గులేని చర్య అని విమర్శించారు. 30వేల ఉద్యోగాలు రాకుండా కేసులు వేసింది కాంగ్రెస్ పార్టీ కాదా? అని ప్రశ్నించారు.
ఆ కేసులు ఎత్తివేయించి బీఆర్ఎస్ ఇచ్చిన ఉద్యోగాలను భర్తీ చేసి సీఎం రేవంత్ రెడ్డి జబ్బలు చర్చుకొంటున్నారని ఎద్దేవా చేశారు. కేసీఆర్ ప్రభుత్వ హయాంలో సుమారు 80వేలకు పైగా పోస్టులను భర్తీ చేశారని గుర్తు చేశారు. కాంగ్రెస్ మ్యానిఫెస్టోలోని పేజీ నం. 32లో పది లక్షల మంది నిరుద్యోగ యువతకు నెలకు రూ.10వేల చొప్పున నిరుద్యోగ భృతి ఇస్తామని చెప్పిన రాహుల్, సోనియా, రేవంత్ రెడ్డిలు దీనిపై జవాబు చెప్పాలని డిమాండ్ చేశారు.
కాంగ్రెస్ వదిలిన బాణం అశోక్
ఎమ్మెల్సీ ఎన్నికల్లో కాంగ్రెస్ బహిష్కృత నేత బక్క జడ్సన్ అధికారంలో ఉన్న పార్టీ నేత అయి ఉండి కూడా ఆ పార్టీ తప్పులను ఎప్పటికప్పుడు ప్రశ్నించారని, నిరుద్యోగులకు న్యాయం చేయాలని కోరినందునే ఆయనను బయటకు పంపించారని జనార్దన్ పేర్కొన్నారు. జడ్సన్ను ఓడించేందుకే ఆ పార్టీ నేత బల్మూరి వెంకట్.. ఎమ్మెల్సీ ఎన్నికల బరిలో అశోక్ను దించారని తెలిపారు. కాంగ్రెస్ హామీలు నెరవేరాలంటే ముందుగా నిరుద్యోగులందరూ ఆ పార్టీ అభ్యర్థి తీన్మార్ మల్లన్నను ఓడించాలని పిలుపునిచ్చారు.