Telangana | హైదరాబాద్, జూన్ 23 (నమస్తే తెలంగాణ) : ఉద్యోగాల కోసం నిరుద్యోగులు రగిలిపోతున్నారు. ఇచ్చిన హామీలు మరిచిన కాంగ్రెస్ ప్రభుత్వంపై నిప్పులు చెరుగుతున్నారు. అధికారంలోకి వస్తే గ్రూప్స్ పోస్టులు పెంచుతామని ఎన్నికల్లో ఇచ్చిన హామీని తుంగలో తొక్కిన సీఎం రేవంత్ వైఖరిపై మండిపడుతున్నారు.
గద్దెనెక్కిన తర్వాత కాంగ్రెస్ అసలురంగు బయటపడిందని, నిరుద్యోగులను నమ్మించి నయవంచన చేసిందని దుమ్మెత్తిపోస్తున్నారు. తమకు నమ్మకద్రోహం చేసిన కాంగ్రెస్ ప్రభుత్వానికి వ్యతిరేకంగా పెద్ద ఎత్తున నిరసనలు కొనసాగిస్తున్నారు. ముఖ్యంగా పది ప్రధాన డిమాండ్ల సాధన కోసం ఉస్మానియా యూనివర్సిటీ ఆర్ట్స్ కాలేజీ వేదికగా నేడు ఉదయం నుంచి ఆమరణ నిరాహార దీక్ష నిర్వహిస్తున్నట్టు నిరుద్యోగ జేఏసీ పిలుపునిచ్చింది.
దీక్షలో గ్రూప్-1, గ్రూప్-2, గ్రూప్-3తో పాటు డీఎస్సీ, గురుకుల టీచర్ పోస్టుల అభ్యర్థులు, 46 జీవో బాధితులు పెద్దసంఖ్యలో పాల్గొనేందుకు సిద్ధమయ్యారు. నిరుద్యోగుల న్యాయమైన డిమాండ్ల పరిష్కారం కోసం ఆమరణ నిరాహార దీక్ష చేస్తున్నట్టు జేఏసీ నాయకుడు మోతీలాల్ నాయక్ ప్రకటించారు. దీక్షకు అన్ని విద్యార్థి, నిరుద్యోగ సంఘాల పూర్తి మద్దతు ప్రకటించాయి. బీసీ సంఘం జాతీయ అధ్యక్షుడు ఆర్ కృష్ణయ్య సైతం తన సంపూర్ణ మద్దతు ప్రకటించారు.
‘ఉద్యోగాలు ఇస్తారా..? గద్దె దించాలా?’
‘ఉద్యోగాలు ఇస్తారా..? గద్దె దించాలా?’ అనే నినాదంతో ఉద్యమాలు చేస్తామని తెలంగాణ నిరుద్యోగ యువత ప్రకటించింది. ఇచ్చిన హామీల అమలుకోసం ఇప్పటికే ఇందిరాపార్కు వద్ద వేలాది మంది నిరుద్యోగులు మహాధర్నా నిర్వహించారు. తెలంగాణ పబ్లిక్ సర్వీస్ కమిషన్ (టీజీపీఎస్సీ) కార్యాలయం వద్ద పెద్దఎత్తున ధర్నా చేశారు. అంతకుముందు సచివాలయం ముట్టడికి సిద్ధపడిన నిరుద్యోగులను పోలీసులు ముందస్తుగా గృహనిర్బంధం చేసి అడ్డుకున్నారు. ఇందుకు కొనసాగింపుగా నల్లగొండ, కరీంనగర్, భద్రాద్రి కొత్తగూడెంతో పాటు పలు జిల్లాలో నిరుద్యోగుల నిరసన కార్యక్రమాలు జోరందుకున్నాయి.
అడిగితే అరెస్టులా..?
కాంగ్రెస్ మాయమాటలు నమ్మి ఆ పార్టీని అధికారంలోకి తెచ్చేందుకు ఓటర్ల కాళ్లావేళ్లా పడి ఓట్లేయించినందుకు తమకు కాంగ్రెస్ ప్రభుత్వం తగిన గుణపాఠం చెప్పిందని నిరుద్యోగులు బాధపడుతున్నారు. నెలరోజులు పుస్తకాలు పక్కనబెట్టి ఆ పార్టీ గెలుపు కోసం పాటుపడ్డామని, తమను కాంగ్రెస్ నమ్మించి మోసం చేసిందని ఆవేదన వ్యక్తం చేస్తున్నారు. రెండు లక్షల ఉద్యోగాలు ఇవ్వడంతో పాటు నిరుద్యోగులందరికీ న్యాయం చేస్తామన్న కాంగ్రెస్, ఇప్పుడు హామీలు అమలు చేయాలని అడిగితే పోలీసులతో అరెస్టులు చేస్తున్నదని మండిపడుతున్నారు. హామీలు నెరవేర్చేదాకా తగ్గేదే లేదని, ప్రత్యేక తెలంగాణ కోసం ఎలా పోరాడామో ఇప్పుడు తమ డిమాండ్ల సాధన కోసం అలానే ఉద్యమిస్తామని హెచ్చరిస్తున్నారు.
నిరుద్యోగుల 10 ప్రధాన డిమాండ్లు ఇవే